Normalmente en muestro payiz i en el mundo entero en enverano la djente esta en vakansas. Es djusto ke estas vakansas no turan tres mezes; estas vakansas son entre 2 o 4 semanas. Ma las personas son mas kalmas en estos mezes de vakansas. Mizmo los mansevos se topan en diferentes kampos de vakansas, o se englenean en los lugares de vakansas. En Estanbol, para los miembros de muestra komunidad la izla de Büyükada tyene una grande importansa. La izla de Burgaz tyene dainda una importansa; ma la populasion no es tan grande i importante.
El Klob Alef ke se topa en la Büyükada tyene una grande importansa. Entre semana serka de 400 mansevas i mansevos estan en el klob i azen diferentes spores. Los diyas de fin de semana dizen ke no ay la mizma populasion. El tereno del klob apartiene al estado i lo alkilan para 5, 10 o 15 anyos. Este anyo era la fin de esta epoka i a la fin, los dirijentes de la komunidad reusheron a alargar para diez anyos esta permision.
En muestro payiz, de una vanda keren azer pas kon los kurdes, de la otra vanda no deshan libero los ke ayudaron - verdad o no - los kurdes. Oy en diya ay 10 a 15 prezidentes de las munisipalidades ke estan en prezo.
La Turkiya tyene emportantes problemes kon la oposision ke en las anketes tyene mas munchos votos ke los partidos ke estan en el poder.
Vemos ke en el Medio Oriente dainda no pudieron realizar una PAS i no liberaron los rehenes ke ay serka de 21 mezes ke se topan en las manos de los militanes Palestinianos.
El primer ministro Israelyano, Netanyahu kreo ke se fue por la tresera vez al Palasio Blanko, a Washington. Netanyahu mizmo prezento la kopya de la letra ke embiyo al Komite de Nobel dizyendo ke su kandidado es el prezidente Trump. Syertos fueron muy kontentes, i syertos empesaron a yorar kontra esta desizion. Vamos a ver lo ke va afitar.
Kon estos dirijantes kreo ke no vamos a topar repozo ni en los diyas de enverano. Bivir i ver.
