Ya savemos ke ay kada diya muevos evenimyentos en la politika. Netanyahu, primer ministro israelyano bolo alos Estados Unidos i tuvyeron syertas sedutas kon el Prezidente Amerikano Trump. El primer punto es de valorizar si los atakes a los butos iranianos fueron bastante efektivos ande estan aparejando bombas nukleeres. Trump dize ke estuvo efektivo; ma el Pentagon i los israelyanos no son de la mizma idea. I los Israelyanos keren la permision de Trump, para atakar una otra vez a los Iranianos si empesan a lavorar sovre las bombas nukleares.
Reelmente esta muy difisil de bivir kon repozo en este mundo. De la otra vanda se esta avlando de una pas entre los Israelyanos i los Palestinianos en Gaza. Espero ke van a asegurar la pas i los rehenes van a topar el repozo kon sus libertad i los muertos van a ser enterrados para alkansar a GanEden.
Desparte de estos evenimyentos ay munchos evenimyentos kulturales en muestro payiz i en muestra sivdad. Estamos publikando en inglez un livro sovre las komidas Djudias de Izmir (segunda edision). De la otra vanda estamos publikando un livro preparado por muestro amigo Rubi Asa: “las emprentas de los Djudios en las tierras de Estanbol”. Reelmente un livro ande se lavoro bastante i el livro fue dedikado a muestro amigo – Ganeden bueno ke tenga - Elio Medina. Es ayer ke estavamos en la Ada kon muestro avokato de muestra Komunidad; Kantik, i estavamos avlando de los chiftlikes ke fueron fondadas en diferentes sivdades del Imperio Otomano para ke los Djudios de diferentes payizes se ambezen la agrikultura. No savemos si dainda la Komunidad Djudia tiene el derecho de ser patron de estas tierras. Es muestro amigo, Anri Niyego ke lavoro anyos en primero para publikar un livro sovre el kuartier de Yel değirmeni i Haydarpaşa, i agora se okupa de syertos chiftlikes. I ay una otra damma ke kere publikar un livro sovre estos chiftlikes. Vamos a lavorar i ver a la fin si reelmente va ser un echo bastante seriozo.
En enverano tenemos mas munchas okaziones para pueder diskutar diferentes sujetos. Sujetos istorikos i kulturales, porke tenemos mas munchas relasyones en las Adas.
