Ay semanas ke esto eskrivyendo sovre la situasion politika en el Medio-Oriente. Esta semana esto muy kontente, porke las armas no gomitan mas fuego; i espero ke esta situasion va turar. Por Gaza estan avlando de diferentes proyektos. Disheron ke kuatro payizes Arabos van a ser en la direksion de la rejion i todo va ser dulse i miel. Kreo ke asta agora dingun payiz Arabo tuvo buenas relasiones kon los Palestinianos. Si alkansan, todos van a ser orozos. Los Arabos, los Palestinianos, los Israelis i los Djudios del Mundo entero. Mizmo mi esfuegra ke se keria ir a Israel para ver su ermana grande i su ermano en Rosh Ashana. Kuando dyo karar, un diya dospues empeso la gerra entre Israel i el Iran i le dishimos te vas a ir en Rosh Ashana, ma no de este anyo. En unas kuantas semanas la situasion troko.
Kon esta situasion no tenemos turistos Israelyanos en muestra sivdad ni en muestro payiz. Komo son los mijor klientes del Muzeo Djudio de Estambol tenemos mas manko vijitadores. Esta semana me fui diya de alhad al Muzeo para entregar un alay de livros ke me dyeron de una kaza. Los ke se keren dezbarasarsen de los livros ke tyenen en kaza no saven lo ke deven de azer. Yo so el Salvador de esta djente. Ma no fue muy kolay alkansar el Muzeo. Los LGBT (lesbian, gay, ets) tenian una manifestasion en Pera. Ma komo se espantan serraron todos los kaminos ke salen a esta kaleja.
Tenemos en muestra biblioteka un mansevo, Semih Alalu ke esta lavorando los sesh mezes dalkavo para klasifikar los livros non ebreos ke se topan en la biblioteka. Livros ke fueron empresentados al muzeo por Naim Güleryüz i de la famiya de Yermiya Yılmaz Benadrete. Kreo ke vamos a transportar la biblioteka de Judeo-Espanyol ke se topa en el Şalom. Komo ay una persona ke va pueder ayudar a los investigadores, este echo va ser mas seriozo. Reelmente no es muy fasil de lavorar en un echo asemejante. Komo la semana pasada estavamos en Toronto para la seremoniya de diploma fui envitado por la profesora ke es responsavle del Sentro de los Estudios Judaikos. I avia una ekspozision sovre los livros en ebreo i en arabo ke tyenen relasyones asemejantes. En mi onor me ekspozaron livros antiguos de mas de 500 anyos. Avia dos livros publikados por la primera imprimeria en el Imperio Otomano “David i Samuel Ibn Nahmias” . Ya tenemos el “Midrash Teilim” de la mizma imprimeria en el Muzeo Djudio. Un israelyano i una mujer Azeria son responsavles de los livros raros en la biblioteka “Fisher Rare Book Library”. Es una biblioteka muy eksepsional.
Kuando se serran las eskolas toda la djente se van a la Ada, i este anyo fue lo mizmo. Enveranada buena i klara…
