Ay serka de una semana ke esto en Toronto i en Montreal. Estuve en Toronto porke mi ijo eskapo la Universitad i komo organizan seremonias de graduasion, fuimos prontos kon mi mujer i mi ija ke vino de Londra. Es la segunda vez ke esto vijitando el Kanada. Esta vez tuvimos la posibilidad de ir a Montreal. Es muy enteresante de oyir la lingua franseza en las Amerikas. Diya de Shabat munchos Djudios relijiozos se estavan indo al Kal verso las dyes de la demanyana. En una kaleja en kada kaza estava eskrito en ebreo el nombre de la famiya ke bive aya. Kreo ke vos va kontar otras kozas en mi artikolo en el Amaneser. Oy en diya este payiz, kon su Komunidad Djudia de mas de 400.000 almas es importante para el Djudaizmo Mondial.
Kada demanyana esto mirando lo ke esta afitando entre Israel i Iran. Los Amerikanos estan en la gerra ayudando a Israel. Ma kreo ke los Iranianos dyeron danyos en diferentes sivdades de Israel: Tel Aviv, Yerushalayim, Haifa, Bersheva, ets. Dospues de estos esforsos no se si alkansaron a dar fin al program nuklear de este payiz. No savemos lo ke va afitar a la fin; ma kreo ke si los Iranianos tyenen fuzes kontadas los van a eskapar en poko tyempo i los Israelyanos van a pueder topar repozo.
Mi esfuegra ke tyene una ermana i un ermano en Israel, esta telefonando kaji kada dos diyas para tomar haberes. Mizmo si kada dos - tres diyas ay un soldado ke mos desha la vida en Gaza, la situasion esta mas kalma.
Komo los aviones ke no fonksyonan para Israel, el estado Djudio esta arekojendo los Israelyanos ke estan el las kuatro partes del mundo. I ay los turistos ke se toparon en Israel. I fue un grande problem para tornar atras. Un amigo ke se topava en Israel pudo tornar una semana dospues pasando por Sharm al Sheikh i el Ejipto.
Esperamos ke la situasion se va ameliorar i todos van a topar el repozo.
