La semana pasada eskrivi mi artikolo unos kuantos diyas antes. Ma era la data kuando el Şalom no fue publikado. I dospues dishe lo ke devia de eskrivir; un artikolo sovre el mediko Musa Albukrek. El era Doktor; el era muzisien i tanyava el violin. El era artisto i los tyempos dalkavo kada mez desinava para el Amaneser. El tenia en su kaza un muzeo de djugetes en la Ada. Reelmente un ombre muy enteresante i kargado de kultura komo todos los Albukrekes. El uno un poko mas, el otro un poko manko. Ke su alma repoze en Gan Eden.
Esto eskrivyendo mi artikolo noche de alhad. Tres diyas dospues ke Israel atako el estado Persiano. Grande koraje. No se si es para protejar los Amerikanos ma en primero fue solo los Israelyanos ke atakaron. Atakaron las tyerras ke se topan a 2.000 o 2.500 kilometros de distansia. Kon fuzes ke pezan no se kuanto! Dospues ke reusheron el Amerikano trokaron de karar i disheron ke van ayudar los Israelyanos. I los Inglezes estan prontos para ayudar el Estado Djudio. Yo, no kero la Gerra; ma si los Iranianos van a atakar kon fuzes balistikas va ser una dezgrasia para Israel; i para todo el mundo.
Kualo es la situasion en Israel? No estan en repozo i kada punto estan prontos para ir a los abrigos ke se topan debasho de las kazas. Kada kaza malorozamente no tyene esta posibilidad. I noche de Shabat i de Alhad syertas kazas fueron bombardeadas en Batyam i solo oy entre las setenta i sinko kazas, las ventisinko deven de ser derrokadas. I solo noche de Shabat avia 4 o 5 muertos. No savemos lo ke va afitar. I no savemos la kantitad de fuzes ke tyenen los Iranianos. Para los Israelyanos es mas fasil de topar fuzes, los Iranianos no tyenen la mizma posibilidad. Kreo ke son los Rusos i los Koreanos del norte ke les pueden dar. Antes de esta gerra se estimava ke los Iranianos tyenen 3.000 fuzes. I si embiyan 200-250 fuzes kada diya i noche, a la fin de dos semanas na van a tener nada en la mano. Es djusto o no?
Esta gerra puede trokar munchas kozas en el Medio Oriente i en el mundo entero. Ma esto esperando ke esta gerra no va trayer grandes problemes al Estado Djudio.
Ke el Dyo sea al ayudo de los Djudios.
