La semana pasada, sinko diyas estava kon toda mi famiya en el Portugal; en Lisbon i en Porto. No tengo la nasyonalidad de este payiz i es la primera vez ke topi la posibilidad de vijitarlo. Mizmo ke era un payiz ke era dirijado por un diktator, su nombre era Salazar. Malgrado esto todo syertos diplomates Portugezos ayudaron muncho a los Djudios. I salvaron la vida de miles de Djudios. Oy en diya biven 500 Djudios en la kapitala Lisbon, 500 personas en Porto i dos mil almas en una sivdad serka de Lisbon ke es dirijada por los Habates. Desparte de estos Djudios, mil Israelianos biven en estas dos sivdades i komo todos los Israelyanos no se karishean a la vida de la Komunidad Djudia, no se van ni al Kal. En los anyos 70 resivia le revista Djudia en Fransez: L’Arche. Aya estavan kontando de syertas personas ke asendian kada noche de Shabat una kandela aryentro de un almaryo. Es dospues ke entendyeron ke eran Marranos i no kerian ke se sepa ke eran Djudios. Oy en diya la Komunidad de Belmonte es achetada komo una Komunidad Djudia mizmo Ortodoksa.
Noche de Alhad tornando a Estanbol empesi a meldar los diarios de unos kuantos diyas. Malorozamente nada esta trokando. Si miramos la situasion entre la Rusia i la Ukrania, esta la mizma koza. Mizmo el diya dalkavo los Ukranianos dyeron grande danyo a los aviones rusos kon los IHA’s. Kon los instrumentos de ayre sin personas. I reelmente tuvyeron un grande sukseso kontra este payiz tan fuerte. Un diya dospues un diyalogo en Estanbol para topar “La Pas” entre los dos payizes. Para trokar los rehenes i los soldados ke tyenen entre 18 i 25 anyos. Reelmente un grande pekado.
Vemos ke nada se troko en Israel. Los soldados Israelyanos estan kontinuando a echar bombas en kada punto de Gazza; ma no reusheron dainda a salvar los rehenes ke se topan en los tuneles. Espero ke vamos a ver la fin de esta situasion.
En muestro payiz, en Turkiya se esta avlando de una PAS entre los Turkos i los militanes Kurdes. Espero ke se va realizar. Ay una gerra los 40 anyos dalkavo; i pedrimos munchas almas. I komo el payiz gasto milyardas de paras, esto dyo un grande danyo a la ekonomiya. El Medyo Oriente reelmente es una rejion ande ay munchos konfliktos i no es muy kolay de rezolverlos.
Empesi mi artikolo kon mi viyaje familial al Portugal. Vos va kontar syertas kozas en el Amaneser.
