Diya de Alhad en los “Enkontros de Alhad” fui musafir. El Balabay era Jake Kohenak. El sujeto era “El Hahambashilik en Turkiya”. Es diya de lunes ke me bushkaron, i me disheron ke aviya munchas kozas ke oyeron por la primera vez. Komo va ser elijido el muevo Hahambashi? Asta agora ken fueron elijidos? Kualo es la direksion de la Sosiedad Djudia de Turkiya para no dizir la Komunidad Djudia. Dospues de los evenimyentos del 15 Junio 2016, ke tyenen raporto kon el famozo Fetullah: no estamos mas empleando en turko el nombre de Komunidad Djudia – Cemaat; i estamos empleando el biervo “La Sosiedad Djudia de Turkiya- Türk Yahudi Toplumu”. Deke? Porke dospues de los evenimyentos del famozo Fetullah, no fue un biervo muy makbul: “La Komunidad-Cemaat”. Oy estamos mas kontentes de emplear el biervo “Sociedad-Toplum”.
Vamos a tener las eleksyones del Hahambashi en el mez de Septembre. I kuatro de los raves; el Rav David Sevi, el Rav Naftali Haleva; el Rav İzak Alalu i el Rav İzak Peres van a ser los kuatro kandidatos para ser elijidos komo Hahambashi. Es un posto bastante importante en la istoria de los Djudios Otomanos i los Djudios de Turkiya. Todos saven ke oy en diya semos solo 15.000 personas en Estanbol i entre 1.000 i 1.200 personas en izmir. Kreo ke la populasion esta pujando en İzmir porke ay syertos Istanbullis ke moran en Çeşme, en Urla i en otros kazales de İzmir.
En el Imperio Otomano no era muy fasil de salir a bash kon los Djudios. Porke kada kazal teniya su Hahambashi, i kada vez ke tenian problemes se ivan al sultan para azersen pas. I esta situasion enfasio a los sultanes i en el anyo 1835 disheron ke keren un Hahambashi. I el muevo reglamento del Hahambashilik fue achetado en 1865. Dospues de esta data el Sultan solo estava en kontakto kon el Hahambashi. En el empesijo no le davan importansa. Ma dospues kuando el Konsilyo Laik dyo apoyo al Hahambashi, el fue el ombre el mas importante en la Komunidad Djudia.
Esta vez ken puede votar? Kada miembro de la Komunidad Djudia ke tyene mas de 18 anyos, ke tyene la nasyonalidad Turka, mizmo si biven afuera de la Turkiya i ke achetan sus segunda adreso en Turkiya, van a tener el derecho de votar para el Gran Rabino.
Ken puede ser Hahambashi? Los Raves ke son achetados komo Rav, ke tyenen la nasyonalidad Turka i ke sirvyeron los 5 anyos dalkavo por la Komunidad Djudia Turka.
Bivir i ver. Vamos a votar en el mez de Ilul.
