Syertas semanas no me vyene al tino lo ke devo de eskrivir en mi artikolo. Kon el Prezidente Amerikano Trump, no tenemos mas problemes. Kon tantas aktividades, kada semana ay un alay de kozas ke puedemos kontar. Kuando Ganeden bueno ke tenga Klara Perahya me disho ke devo de eskrivir kada semana para el Şalom anyos antes, me disho ke devo de eskrivir sovre la politika aktual. I sos solo tu ke puedes eskrivir. No se si era djusto, ma en el empesijo no era muy kolay de eskrivir artikolos sovre la politika. Ma dospues fue mas fasil.
La semana pasada Trump estava en el Medio Oriente i vijito la Arabia Seudita, el Katar i los Emiratos Arabes. Ya savemos ke no se fue a Israel. Mizmo ke tyene relasiones intimas kon muestro prezidente Erdoğan, no vino mizmo a muestro payiz porke el Prezidente Ruso, Putin no vino a Estanbol para la seduta programada. Lo ke izyeron los Ukranyanos kon los Rusos en Estanbol fue el troko de los soldados esklavos de las dos partes. No estamos entendyendo lo ke se pasa entre Trump i Netanyahu. Las relasyones no estan muy kaynte! Ma no savemos deke. Israel diya de vyernes, i diya de shabat entro a Gaza , esta vez para no salir de estos teritoryos. Mas de syen muertos solo el primer diya. Los Israelyanos dizen ke debasho de kada edifisio ke fue bombardeado por los Israelyanos se topava una unita de los militanes del Hamas.
Si tornamos a Trump, vemos ke se fue a este viyaje kon los CEO’s de las mas grandes kompanyias de teknolojia. El buto era de konvenser los Arabos para ke agan investigasiones en los Estados Unidos. No se si savesh, ma los Estados Unidos tyenen en la Arabia Seudita, en Katar, en Kuveyt, en los Emiratos Arabes, en Bahreyn i en Umman las mas grandes bazas de aviasion i de marina. Tyenen mas de 50.000 soldados Amerikanos en esta rejion. En el 2017 Trump avia realizado un tratamyento de 500 milyardas de dolares kon la Arabia Seudita. Esta vez merkaron armas de 142 milyardas de dolares. Afirmaron akordos de 1,4 trilyones de dolares kon el Katar i le vendyeron los aviones Boeing por 200 milyardas de dolares. I kon los Emiratos Arabes akordos de 1,3 trilyon de dolares. Reelmente fue chifros ke no se puede realizar fasilmente. El Komersante-Presidente Trump torno muy orozo de su primer viyaje. Ya savemos ke las kompanyias afirmaron emportantes proyektos kon estos payizes Arabos.
Esta rejion de diya en diya va tener una grande importansa. I es por esta razon ke estan lavorando por esta rejion.
