Dospues ke reusho a karishtrear el mundo entero, i no troko nada asta oy, Trump organizo su primer viyaje al Medio-Oriente. No troko nada en Gaza; ni en la Ukrania; los Kanadienes dospues de las eleksyones eskojeron sus muevo prezidente i el no acheto ke su estado sea una provensya (eyalet) de los Estados Unidos. Dospues de kuatro mezes su primer viaje va empesar kon Katar i la Arabia Saudit. Es muy enteresante ke dyo karar de no irse a Israel. Muestro prezidente, el sinyor Erdoğan lo estava asperando dospues de su invitasion. Ma kreo ke no pensa vinir ni a la Turkiya. Kon sus esforsos, Estanbol va ser la sivdad ande los Rusos van a tener una seduta kon los Ukranianos. I kreo ke esta seduta fue realizada kon los esforsos de Trump.
Esto pensando deke Trump esta vez dyo karar de no vijitar Israel. Kreo ke entre los dos lideres uvo syertos problemes, i Trump para apenar Netanyahu no se esta indo a Israel. Se esta avlando ke Trump va achetar un Estado Palestiniano! I esto va ser muy difisil para los Israelyanos i los Djudios del mundo. Deke estos payizes arabos? Porke son payizes muy rikos i Trump kere ke merken milyardas de armas. El mundo no kere mas bivir en pas. Kere gerras o kon munchas armas kere ke los payizes se espanten de eyos. Dospues de la Segunda Gerra Mundial los payizes i sus lideres kerian ke el mundo este en pas. Ma dospues de 80 anyos kreo ke empesaron a trokar karar. I keren vender armas para ganar munchas paras.
No se si es kon el apoyo del Amerikano Trump; ma es por la primera vez ke un Kardinal Amerikano fue elijido Papa, lider relijiozo de 1 milyarda i 400 milyones de Katolikos. El muevo Papa, el 14en Leo fue elijido a sus 69 anyos. No savemos si va ser un ombre ke va protejar los ke tyenen de menester i los proves komo el Papa Franchesko. El Papa Franchesko kreo ke fue una eksepsion por la umanidad i espero la mizma koza por el Papa Leo. Reelmente no es muy fasil de ser el lider de los Katolikos. Ya savemos ke la mas grande populasion de Katolikos biven en Brasil, en Meksiko, en las Filipinas, en los Estados Unidos, en la Italia, en el Kongo, en la Kolombia, en la Olanda, en la Fransia, i en la Polonya. Dos vezes en muestro payiz tuve la okasion de vijitar un Papa. Es kon grande plazer ke vamos a tener la posibilitad de meldar el livro ke fue eskrito por el Sinyor Ronaldo Marmara sovre el Kardinal Roncaldi ke fue Kardinal en Estanbol en los anyos de la Segunda Gerra Mondial. I el ayudo a los Djudios para salvarlos de los Nazis.
