La semana pasada no eskrivi mi artikolo para el Şalom. Mi patrona me dyo permisyon solo para una semana. Oy dos semanas dospues, estamos de muevo endjuntos. El Sinyor Sırrı Süreyya Önder, parlamentaryo en muestro payiz i miembro del partido DEM fue el ombre el mas importante para la paz kontinual entre los Kurdes i el Estado Turko. Diya de Shabat mos desho la Buena Vida. Diya de alhad se organizo una seremoniya para komemorarlo. A la salida, el prezidente del partido de la oposision CHP, Özgür Özel fue atakado. Esto es una yaga para muestra demokrasia. Reelmente keremos una demokrasia rezya en muestro payiz.
Kualo pasa en los Estados Unidos? El prezidente Trump se kalmo un poko. Kreo ke entendyo ke no puede konvenser todo los payizes kon su urdjensya i kon sus kaprichos. El Estado Chinezo i los payizes Evropeos no tyenen adjle komo Trump; i keren dar karar kalmamente. Son desiziones muy importantes. Ma kreo kon estas ovligasiones, los payizes Evropeos van a tener una mijor ekonomiya i van a dar una mas grande importansa a la defensa de los payizes evropeos. Malorozamente el mundo troko. Antes aviya solo dos fuersas importantes: los Amerikanos i los Rusos. Mizmo si un alay de payizes se espartyeron de los Rusos, el payiz dainda es una fuersa muy importante. I malorozamente su presidente Putin komo no kere deshar el poder, se esta desmodrando. Ya entendimos ke no es muy sano ke un ombre reyne mas de 8 anyos en el poder. En este sujeto, los Amerikanos son bastante intelijentes. Es djusto ke Trump esta pensando komo puede kontinuar su prezidensya por una tresera vez. Vamos a ver si va pueder reushir a burakar esta regla.
Oy en diya en muestro payiz, la ekonomiya esta muy difisil para los eksportadores i para los industriales. Los salarios son muy altos en komparezon kon otros payizes (El Ejipto, el Vietnam, la India, la China, el Bangladesh…) las taksas son bastante altas i la elektrisita esta muy kara. Oy mizmo syertas firmas de eksportasion estan eksportando o vendyendo artikolos ke fueron produsidos en la Italia. El mundo esta trokando. Los Almanes no keren mas a los Vedres (Yeşiller) porke las mas grandes fabrikas estan en grande difikultades, porke estan konservando la natura. Keremos konservar la natura. Ma no keremos ke las mas grandes fabrikas serren sus puertas. Ya oyimos ke la fabrika Volksvagen empeso a produsir armas en su fabrika! Vamos a ver ke los Almanes para protejar las tyerras Evropeas van a dar grande importansa a la defensa de sus payiz i de la Evropa. Los Almanes van a enforteser sus defensa, esta vez espero para bien, porke no fue este modo en las dos gerras mondiales.
En Israel los problemes no se estan eskapando. Se dize ke yamaron los mansevos una otra vez al miluim. Espero ke no vamos a ver gerra otra vez. Keremos pas en el Medio-Oriente. I keremos ke los rehenes tornen sanos i rezios.
