En el anyo 1989, yo me topava en la yeshiva Midrash Sefardi. Komo syempre me plaziya muncho la muzika i los makames. Yo tambien lavorava en el instituto “Renanot” de muzika. Aya el Sinyor Hazan Ezra Barnea mos dava lisyones de makam. Para mi era una okazyon maraviyoza. Lavorar i estudyar a lo manko una vez a la semana la muzika. Akel anyo estavan aprontando un konserto en Tel Aviv. Estavamos lavorando kon los kantes de el Sinyor Rabino i Hazan İzak Algazi. El sinyor Ezra Barnea me envito a esta nochada komo Hazan de İzmir, sivdad de Algazi. Lavorimos un syerto tiempo kon el Profesor Edwin Seroussi i mos aprontimos para esta noche.
La nochada tuvo lugar en el oditoryum de la universita de Tel Aviv. Muncha djente vino para oyir la muzika de Algazi i tambien de los Hazanim de Turkiya. Para mi era una okazyon muy grande. Antes kon siertos Hazanim kantimos “Maftirim” primera vez en mi vida. Era muy difisil para mi ma los Hazanim i el Profesor Seroussi me ayudaron muncho. Akea noche estava el Hazan Yaakov Kohen, el Hazan Binyamin Shikiar de İzmir, el Hazan Moshe Sunak, Yeoshua Habib. Despues el Rabino i Hazan Rafael Abuaf kanto pizmonim ke kantava el Rabi İzak Algazi.
Akea noche para mi era una eksperiensya muy emportante. Munchos anyos estava en İzmir kon Hazanim muy buenos i me ambezi munchas kozas. Ma esta okazyon me avyo las puertas de adelantar mas muncho en el Hazanut, ambezar kozas muevas, partisipar en lisyones de makam i de muzika. Esta okazyon me ambezo ke el estudyo nunka no se eskapa.
En kontinuando en el estudyo de la yeshiva este estudyo de la muzika para mi era un plazer. Kuando esto sintyendo los kantes de Maftirim, me akodro de akea noche en Tel Aviv, una noche yena de muzika para todes.
