Me plaze eskrivir sovre los lugares ke konosi en mi chikez. Komo mi chikez paso en Izmir, me akodro munchas kozas de aya. Una de estas kozas es el “Asansor” ke era muy kuryozo para mi.
Yo nasi en Karatash ma siempre morava en Alsancak. Mi Granpapa i Granmama Suhami moravan en Karatash i teniya munchos paryentes por aya. Serka de el Asansor morava mi tiyo, i mas aya morava otro tiyo. Syendo estos kaminos para mi eran muy konosidos, lo ke sintiya era ke este Asansor fue fraguado de parte de un Djudyo ke se yamava Nesim Levi Bayraklı en 1907. Era un pasaje de Karatash a otro lugar ke se yama Halil Rıfat Pasha. Kuando era mas grande primera vez mi padre, de bindicha memorya mos yevo kon mi ermana a ver el Asansor i suvir ariva. Akel tiempo lavorava el Asansor kon la fuersa de la agua o elektrisita. El Asansor tiene una altura de kaji 50 metros.
Akel dia mos suvimos aya i kuando estava ariva para mozotros era muy enteresante. Pudiya ver munchos lugares konosidos. La Sinagoga de Bet Israel ke es muy serka mos resivyo kuando miravamos de ariva. Siempre me akodro de esta vista maraviyoza. Me kontava mi famiya ke ariva era un lugar de pasar un tiempo maraviyozo kuando aviya un sinema i aktividades.
Despues de un sierto tiempo, el Asansor estava aya ma no lavorava mas. Era komo un lugar “asolado” ke esperava sus vizitores ma un tiempo muy largo no aviya ken lo vijite.
Un dia en 1985 meldimos en la gazeta ke la kaleja ande se topa el Asansor se nomino “Kaleja de Daryo Moreno” i empesaron una aktividad para avrir el Asansor de muevo. Akel tiempo, yo estava lavorando komo Hazan en la komunidad i me yamaron para ayudarles. Komo saviya un poko el Ebreo i un poko el Ladino, les ayudi para eskrivir lo ke aviya en la entradura de el Asansor. La eskrita en Fransez i en Ladino. Eskriviya aya en Fransez “Ascenseur Construit Par Mon. Nissim Levy” i en Ladino “Asansor fraguado por el Sr. Nisim Levi”. Los biervos en Ladino eran eskritos kon las letras Ebreas i aya les ayudi muncho. I los ke organizaron me invitaron a la seremoniya de renovasyon.
