Kada anyo en Rosh Ashana meldamos una poeziya maravyoza ke se yama “et shaare ratson leipateah – las puertas de veluntad estan avyertas”. Es un uzo ke esta poeziya se melda en Estambol i Izmir en makam Hüseyni. La poeziya konta la “akedat Yitshak” ke es una kavza muy emportante en la istorya Judia. Avraam Avinu resive el orden de el Todo Poderozo ke le dize de ofreserlo a su ijo regalado Yitshak. Es muy difisil de pensar komo un padre estava pronto para azer esto ma ya savemos ke muestros padres Avraam, Yitshak i Yaakov eran atados a el Dyo muy fuerte.
Ya es savido ke la preva era para Avraam ma este kavzo se yama kon el nombre de Yitshak. El defondo Grand Rabbino Rav Yitshak Haleva mos konto en una okazyon ke en akea ora Avraam teniya 137 anyos i Yitshak teniya 37 anyos. El pasuk eskrive “vayelehu sheneem yahdav – estavan kaminando endjuntos.” Una persona ke es muy vyeja komo Avraam i una persona manseva komo Yitshak komo pudian kaminar endjuntos? Mos kontava Rav Haleva, de bindicha memorya ke Avraam perkurava de kaminar mas presto i Yitshak kaminava mas avagar. I Yitshak estava pronto para ser atado i de ser korban para el Dyo Santo. Por esto yamamos esta kavza komo “Akedat Yitshak”.
En la poeziya de “et shaare ratson” konta la konversasyon entre Avraam i Yitshak bastante triste i yeno de emosyon. Me akodro kuando estava chiko no entendiya deke estavan yorando los Hazanim kuando meldavan esto. Oy esta para mi muncho mas klaro la emosyon. La Gemara mos embeza kuando fue destruido el Bet Amikdash todas las puertan de veluntad se serraron. Solo la puerta de las lagrimas siempre esta avierta. Por esto la Gemara mos dize en Rosh Ashana i Kipur los Hazanim son ovligados de kitar lagrimas para avrir la puerta de piadades.
El Shofar tambien es atado a este akto de Avraam i Yitshak. Dizimos en las orasyones de Kipur kuando vyene el Mashiah, el Rey vamos a sintir el Shofar grande ke se apronto de el kuerno de el karnero de Yitshak ke paso en su lugar. Kuando sintimos el sono de el Shofar mos akodramos tambien este akto de muestros padres. El Shofar tambien mos aze akodrar los tiempos del Mashiah.
Kuando estamos en las sinagogas en las fiestas de Tishri devemos rogar i orasyonar no solo por mozotros. Devemos de akodrar por todos los Djudyos de el mundo. I ansina el Todo Poderozo va resivir muestras orasyones. Rogo i sueto una anyada buena, klara i repozada kon salud buena, kon repozo, kon ganansya, kon pas en el mundo i en la tierra santa de Yisrael. Ke el Todo Poderozo balde todas las setensyas malas i fuertes i mos eskriva en los livros de vidas buenas kon todo bueno, amen.
İ kuando vendra el tiempo de la salvasyon, estaremos djustos i Buenos en Yerushalayim enfrente de el Bet Amikdash para tapar todas las bokas de muestros inimigos ke se atemen presto. Komo esta eskrito en la entradura de la Neila:
Mihael sar de Yisrael
Eliyau i Gavriel
Mos avizan la rihmisyon de El
En la ora de la Neila
Tizku leshanim rabot neimot ve tovot
Ktiva ugmar hatima tova
