Para todos en el mundo egziste okazyones. La persona kuando se enkontra kon eyas las puede ver o no. Esto es una koza muy natural. En mi vida una okazyon tyene un lugar muy importante. En estas kurtas palavras keria kontarvos esta koza.
En el anyo mil novesyentos ochenta i ocho yo me fui a la Yeshiva ke se yama Midrash Sefaradi en Yerushalayim. Este anyo estava aya por kuatro mezes i empesi a ambezarme kozas valutozas. Un poko de TaNah, un poko de Gemara i un poko de Alaha. En İzmir, yo meldava en la sinagoga de Alsancak ke se yama Shaar Ashamayim komo Hazan. Los dirijentes me disheron ke devo vinir para las fiestas de Tishri. En este anyo vine a Izmir para pasar kon mi famiya las fiestas i para meldar en la sinagoga. En este anyo les vino al tino de munchos de organizar un “Tikun” para la nochada de Oshana Raba. Era una okazyon muy importante porke primera vez me iva a topar en este Tikun. El Rabino Nissim Barmaimon, de bindicha memorya, los Hazanim mi sinyor padre R. Nesim Alaluf, de bindicha memorya, el Hazan R. Rafael Moron, de bindicha memorya, el Hazan Leon Hakim, de bindicha memorya i munchos otros se arekojeron i empesaron a meldar.
Se meldo las perashiyot de el livro de Devarim, Zohar la İdara Zuta i Teilim. En las perashiyot todos azen yerros chikos, en meldando Zohar por siguro porke no es fasil. Ma todos en meldando Teilim estavan meldando sin yerros. Yo ke estava komo Hazan en la sinagoga ma kaji en kada linya me estavan topando yerros. Naturalmente el moral estava muy basho. Ma este momento para mi era un tiempo de desizyon. Dishe de mi para mi kuando va tornar a la Yeshiva va pratikar de meldar el Teilim. Torni a Yerushalayim i kada medyo dia en el tiempo de komer estava pratikando el Teilim de el dia. Kada dia kaji una ora estava meldando Teilim i despues ke torni a Izmir el Teilim estava muncho mas mijor.
De este anyo Baruh Ashem kada dia meldo el Teilim kon grande savor. Esta noche ke me estavan korijando para mi fue una okazyon para adelantar.
