Alp Etensel
Charles Aznavour, o kon su nombre verdadero, Shahnur Vaghinak Aznavourian, es sin duda uno de los kantadores mas importantes del siglo 20. El filmo, Monsieur Aznavour es una biografiya unika ke konta la vida personal i artistika de este kantante lejendaryo, de su propryo punto de vista i atravéz de su kamera. El filmo es dirijido por Grands Corps Malade i Mehdi Idir, i no es komo los otros filmos biografikos klasikos.
El filmo empesa kon shenas del Tehcir de los Armenios, i konta la vida de Charles Aznavour kresyendo en Fransya. Al empesijo del filmo, se oyen las bozes en ermenesko, lo ke me plazyo muncho, porke nunka antes avia sintido un filmo en ermenesko. De verdad, es una lingua enkantadora.
Despues vemos la okupasyon de Fransya por los Alemanes, i despues de esto, la liberasyon de Paris – una parte ke me izo yorar sin poder parar... Ma el filmo tomo una otra kolor kuando Edith Piaf ve a Aznavour durante un espektakolo ke el performa. El Aznavour inosente del empesijo se transforma en una makina de ambisyon i dezeo.
Kon su muzika, sus pasajes vizuales i su ambiensya, este filmo es de verdad uno ke vale ver.
Abasho vos va deshar los linkes de mis kantikas favoritas de Edith Piaf i Charles Aznavour, por si keresh oyirlas.
https://www.youtube.com/watch?v=KqLysuqp31k
https://www.youtube.com/watch?v=28nMw4zmdKE
