Röne Kohen Halfon / Estambol
Dizen aktualmente ke fina dos anyos mos ambezamos a avlar i despues de los 50 kale ambezarmos a avlar poko!
Malorozamente u orozamente yo ke ya pasi mi manseves kon muncho lavoro i poko avlar, oy en diya ke esto en la Segunda Primavera me se avryo la alguenga. Entonses vos kontare una chika konversasion ke tuve kon un shofor.
Yo tengo una enfermidad desde anyos, empleyo baston ma malgrado esta ayuda, para suvir al oto al lado del shofor, el kadar ke me esforso me ekskuzo siempre, les demando un segundo, me responden ke no aga adjile, ke no importa, i les digo en riyendo “ya reushi”. No ay muncho tyempo, un shofor me arisivyo en diziendo “Arrivo bueno Sinyora d’Estanbol" (İstanbul Hanımefendisi) (No fue por primera vez) Le demandi komo entendites ke so nasida d’Estanbol? Es verdad ke lo so, es ke esta eskrito en mi frente? "Yo ya entiendo", me disho en sonriendo, i me demando ke kamino tomar para la destinasion un poko aleshada. Le respondi, "tu saves". “Es esta la repuesta ke asperamos!" se eksklamo i kontinuo a avlar en diziendo: "Yo no vide de dengunos la buendad ke vide de los etranjeros, spesialmente de los Judyos mas i mas de los Israelyanos ke konosi, kuando los akompanyo al aeropuerto es kon lagrimas ke mos espartimos. En supito avyo el telefon i oygo kon surpriz “Ma Nishma”, esta avlando kon Israel… Me dirijo el telefon al oyido, i yo en riyendo le dishe, "yo no konosko el Ebreo!"
Me amostro glorifikandose, fotos kon su famiya i los Israelyanos komyendo endjuntos en su kaza… Le dishe ke plazer ke estas partajando estos sintimyentos i rekuerdos. Kontinuimos avlar de la politika siguramente kitimos el Rey, metimos el Vizir, la enflasyon, la ekonomiya, los estudyos, de aki de aya, etc… etc… Me dyo su numero de telefon i me disho ke siempre una ora antes si lo bushko, kon plazer estara disponivle.
Yo siempre aparejo la paga antes de abashar, kuando arrivimos a la destinasion, en abashando del oto siguramente kon seremoniya, el baston, la chanta, el pie, la pacha i antes de serrar la puerta tomi i komplimento, ke so “Linda mujer” i detras me demanda komo si se esta averguensando las paras del taksi, me eksklami! "No! No puede ser, no me tiene afitado este modo de tonteriya, le pagi en riendomos i le dishe, "siguro ke me olvidi, de tanto avlar i azer buen muabbet, me se konfondyo el tino. Le oguri sinseramente echos buenos i kaminos avyertos.
Pasi el diya gustozo, i la sonriza no me manko de la kara.
Ken dize ke no kale ke avlemos muncho, a la kontra para mi avlar esta komo milizina.
