ELEKSIONES EN ANDALUSÍA (ESPANYA)

Judeo-Espanyol
6 Temmuz 2022 Çarşamba

Jaime Aznar Auzmendi

            El pasado 19 de Junio se selebraron eleksiones en Andalusía, una rejión del sud de Espanya. Los konservadores del Partido Popular ganaron una mayoría istórika en la asamblea de Andalusía ke les permeterá de governar solos (de 26 sías a 58), porke avían yegado al poder grasias a los votos de otros partidos. El prezidente rejional, Juan Manuel Moreno realizó una kampanya trankila, sin sovresaltos ni grandes anunsios, prezentándose a la sosiedad komo un líder moderado ke se alesha de los ekstremos. Su stratejia funksionó. Por kontra, los sosialdemókratas del Partido Sosialista segirán en la opozisión kuatro anyos más, porke se fueron un poko atras (de 33 a 30 sías). Ay de tener en kuento ke el Partido Sosialista governó en Andalusía durante 37 anyos, pero sus viktorias terminaron despues de un grave skándalo de korrupsión. Sus muevo líder, Juan Espadas, yeva poko tiempo al frente de los sosialdemókratas de Andalusía, ke renovaron sus kúpola después de un prolongado enfrentamiento interno. Sin popularidad sufiziente ni tiempo para krear una alternativa kreívle, fue derrotado ampliamente. Los sosialdemókratas están dainda leshos de rekuperar el poder.

            Otro de los grandes deziluzionamientos fue el de VOX, ke aspirava a governar djunto kon el Partido Popular. El chiko kresimiento eksperimentado le impedió de alkansar su objektivo (de 12 a 14 sías). Se trata de un partido muy nasionalista i kontra la imigrasión, serka al Front National de Marine Le Pen (Fransia) o a Fidesz de Viktor Orbán (Ungría). Pero el perdedor absoluto de la jornada fue Ciudadanos, un partido liberal ke kompartía el governo kon el Partido Popular. En 2018 eksperimentaron un grande kresimiento, portanto, una serie de malas desiziones le izieron desapareser (de 21 a 0 sías!). El resto de partidos de la siedra, Por Andalusía i Adelante Andalusía, kedaron en las últimas pozisiones. Anteriormente formavan parte de la mizma kandidatura, Adelante Andalusía, ma protagonizaron numerozas peleas ke desepsionaron a los elektores (de 17 a 7 sías). El Alhad ganaron los moderados i piedreron los ekstremos, ganaron akeyos ke son kapaches de sumar votos frente a ken los divizan.

            Ma porké son importantes estas eleksiones? El governo de Espanya esta liderado por el Partido Sosialista, ke observa alarmado las viktorias del Partido Popular en varias rejiones espanyolas. Durante dekadas los sosialistas konsigieron buena parte de sus votos en Andalusía, i agora ven peligrar este territorio. El Partido Sosialista sufrió desgaste devido a la kriza del COVID-19, las konsekuensas ekonómikas de la gerra de Ukrania i las diskrepansias kon sus sosios de governo, ke también piedreron fuersa (Por Andalusía). Malgrado la bashada del desempiego i la suvida de los salarios, egziste preokupasión. Los espanyoles tendrán eleksiones munisipales, rejionales i jenerales en muy serka, en 2023, i las eleksiones de Andalusía pueden markar tendensia. Los konservadores dezean adjustar triunfos para tornar a governar, mientres ke los sosialdemókratas i sus aliados konfían en su jestión para pueder ganar la partida.

            La batalia por la prezidensia de Espanya viene de empesar i promete ser apasionante.

 

Siz de yorumunuzu yapın

Tüm Yorumları Görün