LAS KUATRO FACHAS DE LA LUNA

Judeo-Espanyol
6 Temmuz 2022 Çarşamba

Silva Filiba

Asigun una teoriya bien konosida kada reynado, puevlo, imperyo tiene una limit de vida, komo el umano nase, krese, se engrandese, enflorese i avagar avagar se esparese deshando de atras de eyos unos eskritos en los livros i unas ovras antikas en los muzeos, esto es una ley para todos.

Todos? No ay un puevlo ke komo el pasharo lejendario Phoenix, muere i se arebive de sus proprias sinizas… Mozotros semos atados al kalendario lunar. Semos komo la Luna ke kuando se esparese en el sielo, parese ke mas nunka va amaneser. Ke el sielo yelado i kruel del Galut markara la fin de muestra egzistensya. El mundo entero puedeser ke tuvo esta kreensya… Muestra istorya amostra el kontraryo. Despues de kada eskuridad, la luna aklara muestro sielo, muestra luz ampesa a briyar. Avraam Avinu, primer ebreo i primer monoteisto kontinuo a arelumbrar asta la fin del Reynado de Shelomo aMeleh. Despues las ideas diferentes entre el ijo de Shelomo, Raboam i su Jeneral Yeroboham kavzaron la espartisyon del Reynado (Israel i Yehuda) el Beit aMikdash kayo. Los 70 anyos del Galut de Babel eskuresyo muestro sielo. En el siglo 5, en el tiempo de Ezra i Nehamia el sigundo Beit Hamikdash se fraguo, la luna aparesyo de muevo. El tiempo de Aleksander i en el Imperio Grego fue la luna desparesyendo i arelumbro de muevo kon la Viktorya de los Makabes. (165 A.J.)

Malorozamente los desentyentes de los Makabes kon sus disakordas kavzaran una mueva eskuridad, en 70 en el tiempo de Titus el sigundo Beit aMikdash kayo. I en largo Galut de Roma ampeso 2000 anyos de eskuridad, 2000 anyos de pogromes, engizisyon, sufriyensa i opresyon. Paresiya ke esta vez la luna mas nunka va aklarar i muestro sielo va estar siempre oskuro i preto. En la fin del siglo 19, la luna ampeso de muevo a naser. En la fin del siglo 20, el sielo se aklaro i se arelumbro kon una mueva ardor, mos arebivimos de muevo de muestras sinizas de la Shoa.

Keridos amigos, la luna mas nunka se esparesera de muestro sielo. Siempre se aklarara muestra esperansa, siempre briyara muestra kreensya en el Kriyador, siempre mos sostenera, arogaremos endjuntos ke se afirmen los suetos de muestro korason. Amen…

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR