AMOR AMOR

Judeo-Espanyol
22 Haziran 2022 Çarşamba

Siva Filiba

Konosesh este kupl aedado,

Ke kamina siempre abrasado?

Vyejos, kavesa abokada,

Espalda enkorvada,

Mano tremblando

Pacha arastando…

Se keren tanto bien, "mi amor" dize el, "mi kerido" responde eya, se miran siempre en los ojos. Ay ke se burlan, ay ke se selan, ma todos dizen ke es una verguensa de kaminar ansina komo dos mansevos de diziocho anyos. Kuando ve una rozika en el kamino se la aranka para eya i la vyeja mujer, kuando se va a empleyar, va dizyendo: a mi marido le plaze esto, a mi kerido le gusta akeyo…

El tiempo pasa ansi, ma un diya un ayre de tempesta asoplo en la maalle al torno del pozo. Las mujeres avlavan en gritando, en kada kanton de kalejikas, grupos de djente avlavan kon ravya: No se averguensa este vyejo malo, deshar a su mujer de tantos anyos? Por siguro ke estara detras una mansevika. Gritos, males, endjuryas. El Haham muy ensenyado yamo a los vyejos a su kaza para darles doktrino. "Ombre pekador grande" iva diziendo, ma aya las kozas se aklararon. No es el ke esta deshando a su mujer, si no ke eya…

“Sinyor Haham” fue dizyendo “ya so muy viyeja para darle mas alegriya a mi marido kerido, kero ke este orozo. Ke una mujer manseva le dara gozo. Mizmo i dainda puede tener kriyatura, no es pekado ke este kon mi dainda?” I komo el haham estava dainda gritando, la mujer alevanto la boz i le disho: Sinyor Haham malgrado ke tengo respekto por ti, kero akodrarte ke kuando Lea i Rahel no pudyeron tener kriyaturas, le dieron a Yaakov a Silpa i Bilha. I si me permetes de adjustar, avlaremos de muestro David Ameleh; kuando se izo viyejo, su mujer le eskojo i le dyo a el, la mansevika Shulamit. Se pasa de komentaryos, kreyo Sinyor Haham la ley muestra no dize ke mizmo si un ombre se kaza sinko vezes, es la primera mujer ke tiene el merito de asentarse en sus piezes?

Nada no troko la desizyon de la viyeja mujer, el Get se afirmo i topo una guerfanika mansevika i muy prove para su marido. Se izo ashugar, la lavo i la enmisklo i se la dyo a su kerido. Todo el kazal vino a la boda. Hupa, velo blanko, Sheva Berahot, kupa romper, kantes i bendisyones. El kuple muevo se retiro a su kaza i la vyeja en una kuliba, oroza de aver dado gozo i alegriya.

La konseja se puede eskapar aki. Despues de unos kuantos mezes se tomo haber ke el viyejo se izo miftar. Dos mujeres lo akompanyaron al Bet Akevarot, la vieja i la mueva. Le viyeja iva yorando i dizyendo, esto kontente ke te di oras de alegriya.

“Ya esto oyendo ke me vas a dizir, otrun poko te espero mi amor. I yo te respondere, ya vengo kerido, asentarme komo tabure a tus piezes por la eternidad.”

Amor Amor!  Grande es tu fuersa i tu dolor.

Siz de yorumunuzu yapın

Tüm Yorumları Görün