El Diya Evropeo de la Kultura Djudia

Silvyo OVADYA Judeo-Espanyol
27 Ekim 2021 Çarşamba

Vos avli ke el 24 de Oktobre, dia de Alhad se iva realizar en Estambol, en el Muzeo Djudio, en los kales de Balat i en la kaye el diya Evropeo de la Kultura Djudia. I se realizo. El program del diya fue realizado kon un grupo de dammas enkavesadas por la sinyora Eda Levi. Munchas aktivitades fueron prezentadas en el sitio internet del muzeo. Ma malorozamente solo 350 personas asistyeron a estas aktivitades. No es puedeser un grupo muy flako ma komparado a los anyos pasados no fue bastante atraktiva. Kreo ke la djente esta enfasyado de segir programes en el internet. Agora keren ser mas serka de la djente mizmo si la pandemiya no topo fin. Los programes aparejados en el internet reelmente eran muy enteresantes. I vamos a pueder segir estas aktivitades un anyo entero en el sitio del Muzeo. De la otra parte, teniamos dos ekspozisyones en el Muzeo. La primera era la ekspozision de Alberto Modiano. Ma no es por la primera vez ke fue ekspozada. El livro de esta ekspozisyon se esta vendyendo en la sinagoga de Ahrida i tuvo un grande sukseso. La segunda ekspozisyon topo lugar en el Sentro kultural de la Sinagoga de Neve Şalom. Ya vo lo konti unas kuantas vezes ke realizimos un proyekto kon un fondo de la Union Evropea ande realizimos mas de 65 entrevistas i estamos kontando lo ke la djente bivio en las sivdades i en los kuartieres ande no se bive mas oy en dia.

  I es Emel Benbasat ke realizo una ekspozision kon las fotos ke arekojimos. Una partida topo lugar en la ekspozision, una partida en el livro i syertos en las dos partes. Oy fue por la primera vez ke vide los panos de la eksposisyon. I me plazio. El livro dainda no fue publikado. Tenemos una presentasion el 27 Oktubre para prezentar lo ke realizimos a la djente kon ken izimos las entrevistas. Es diya de shabat a la tadre ke les embiyi la envitasion i me rengrasyaron dizyendo ke van a partisipar. Los esto esperando.

  Un mansevo ke aze filmos mizmo para la televizyon, Aksel Bonfil, orijinaryo de İzmir aparejo un filmo. Ma kreo ke fue un poko largo. De 2 oras i medya. Normalmente era un filmo de una ora, una ora i dyes puntos. Ma komo era muy enteresante no pudo realizar este trezoro en el tyempo demandado. Vamos a ver lo ke mos va prezentar. Por esta razon no estamos puedyendo amostrar enteramente el filmo en esta noche. Vamos a ver syertas partidas del filmo ma no todo. Oy muestra direktrisa, Nisya Allovi me disho ke en avlando kon los responsavles, les aprometimos ke este filmo sea djugado en syertas salas de sinema de las munisipalidades. I lo vamos a realizar. Kreo ke lo puedemos azer en Şişli, Beşiktaş, Beyoğlu, Adalar i puedeser en otras munisipalidades en Estanbol. En İzmir i en Edirne. Mizmo puede ser en Bursa.

  En este diya, una otra aktivitad era el konsyerto del Bando ke tanyaron kantes sefardis. Normalmente el bando es para los imnos. Ma tres anyos antes lavori kon un grupo para ke se ambezen “Los Bilbilikos” i “La Vida do por el Raki” i mos kantaron en un Dia Enternasional del Ladino. I esta vez les dishe ke van a tanyar una ora i medya en la kaye las dodje kantikas sefardis ke se ambezaron. Reelmente fue una aktivitad bastante atraktiva por toda la djente ke se topavan en las kayes.

 Kualo bivimos kon las sinagogas de Balat i los tures turistikos ke fueron realizados? Vos va kontar esto todo en El Amaneser.

Siz de yorumunuzu yapın

Tüm Yorumları Görün