La Identidad Djudia engravada en las pyedras

Silvyo OVADYA Judeo-Espanyol
3 Kasım 2021 Çarşamba

  Kero empesar en dandovos haber ke oy el 31 Oktobre 2021 el presidente de la Republika Turka, el Sinyor Erdoğan, topo la posibilitad de renkontrar el Presidente Amerikano, Biden i el Presidente de la Republika Franseza, Macron en Roma durante la Reunyon de los payises de G-20. Esto era un evenimyento emportante para la Turkiya porke un mez i medyo antes, Biden no avlo kon el presidente Erdoğan en Nueva York durante la konferensia de las Nasyones Unidas. La Turkiya ke fue aleshado del program de los aviones militaryos F-35 porke merko syertas armas de la Rusia oy en diya kere modernizar los 40 aviones militaryos F-16 ke tyene en su enventaryo. I la seduta de oy era muy emportante para la Turkiya. Ya savemos ke la Turkiya mizmo pago una grande partida de los aviones F-35, ma malorozamente no los resivio.

  Oy, el 31 de Oktobre, era el dia dalkavo de la ekspozisyon ke fue realizada en la Sinagoga de Ahrida en Balat. “Las Sinagogas de Turkiya”. I es esta noche ke arekojimos esta ekspozision para pueder realizar una otra eksposisyon en la Sinagoga de Zulfaris. “La Identidad Djudia engravada en las pyedras”. Esta eksposisyon tyene el buto de ambezar a la djente las sinagogas ke egzistyeron en los tyempos antigos. Esto fue el lavora de la arkitekta Çiğdem Öner. Eya lavoro en el Museo para los arshivas del Museo. Arkitekta i enteresada en la arkeologia lavoro buen karar de tyempo para realizar este proyekto. De punto de vista sientifika, es la Sinyora Dra. Siren Bora ke mos ayudo profesyonalmente en este proyekto. Ma malorozamente no tuvimos el mizmo punto de vista para kontinuar para el livro ke era un elemento del proyekto. En este proyekto estan dando rensenyamentos sovre las Sinagogas de Sardis, de Andriake, de Limyra, de Miletus-Platia i de Priene. Todas estas sinagogas tyenen una istoria de mas de 1900 anyos. Este proyekto es muy emportante para mozotros - Djudios de esta tyerra para provar ke muestra istoria no empesa kon la Enkizision Iberika. Tenemos una istoria mas antigua. Ya savemos ke los primeros Djudios moraron en estas tyerras despues de la destruksion del primer Templo. Kuando los Djudios fueron egzilados a Babilon, una partida en tornando a Yerushalayim preferaron de vinir a las tyerras ande estamos bivyendo oy en diya.

  Sardes en Manisa es la Sinagoga la mas famosa i la mas savida. Ma no es la sola ke egziste oy en dia. Vemos otras. I kreo ke anyos despues vamos a topar otras en las tyerras de Anatolia.

  Esta eksposisyon se va avrir el 3 Novembre en la Sinagoga de Zulfaris i va ser avyerta solo tres semanas. Kreo ke vamos a alkansar de publikar el livro ke estamos aparejando. Vos konsejo de vijitar esta ekspozisyon. Mizmo vash a tener la posibilidad de ver la maketa de la Sinagoga de Sardis.

  Vos asperamos a esta ekspozisyon …

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR