Fin agora vos eskrivi en estas pajinas en primero las salatas, despues las supas ke komimos en el mundo en viyajando. De oy en delantre, vos va eskrivir sovre las pastas i las dulsuryas ke gostimos i komimos en viyajando a las sivdades ke mos fuimos. Por egzempyo, el Tiramisu ke komimos en Italya, el Pastel de Nata de Portugal, el Trileche de los Balkanes, el Sellou de Marocco, el Cheesecake ke komimos en Miami, el Dulce de Leche de Arjantina, el Marsipan ke es spesyal en Iberia, tambiyen el Turron kon Churros de Espanya, el Karpatika de Polonya, el Tong Yip i dulses ke se apareja kon arroz i kon leche de Kokonat de Tailand, en la Evropa Sentra komo Ungariya, Chekya, Slovakya, en las kayes i en las patiserias se vende Trdenlik, en los paizes Baltikos, mas muncho se prefera biskochos i kekes mas de pastas. La Gastronomiya de Gresya parese muncho a de los del Turko. Las dursuryas komo Baklava, i kadayıf tambiyen las kozas ke se aparejan kon leche komo mallebi i sutlach es la savor ke komemos en los mallebidjis de Estanbol. En Brasil komimos Beijinho de Coco ke es topizikos de Kokonat tambiyen se puede aparejar kon kafe. Komo se save en esta jeografiya se topa muncho Kokonat i arvoles de Kafe. Medovik es spesyal de Rusya. Aryento del materyal se topa la miel. New York es una sivdad muy Kosmopolit. Puedesh topar en N.Y. djentes del mundo entero. Por esto en las patiserias se topa dulsuryas de todo modo de kultura. Por egzempiyo en Brooklyn biven munchos Djudyos. En las patiserias venden pastas i dulsuryas de Djudyos Ashkenazis. Komo esto en China Town, en Little Italy i ets puedesh topar dulses i pastas de estas kulturas. Ya savemos ke en Inglatierra ay uzansa de bever chay a las 5, ke dizimos en Turko “Besh Chayi”. Al lado del chay komen Biskochos i pastas. Kuando se dize i se avla de Gastronomiya en el mundo entero ya se save ke Fransia es de los primeros. Por esto las pastas i los kekes se konosen de el mundo entero, komo Sufle, Ekler, Profiterol, Krem Karamel, Makaron i Krep. Estas dulsuryas puedesh topar i en Fransia i en Turkiya i en el Leshano Oriente i en Amerika. Komo vos dishe, el Krep es una spesyalite de Fransia. Se vende en las kayes, en las arabas ambulantes, tambiyen en las botikas. Se apareja si keresh dulse komo kon shokola i frutas, o sino kon diferentes kezos i zarzavates.
Las pastas komo meldatesh son diferentes. Ay ke se apareja solo kon masa, ay ke se apareja kon krema i frutas, ay ke se aze kon shokola, en vezes kon leche komo mallebi, o kon sherbet komo Baklava. Kada paiz i sivdad tambiyen rejyones tiene diferentes reseftas i savores. Vos va kontar, uno por uno. En primero la sivdad ke kaminimos i despues las pastas i dulsuryas ke komimos. Va pareser komo “Tereciye Tere satmak” ama sin kontar las dulsuryas de aki no kero eskapar la eskriturya. Son muy rikas las dulsuryas de Turkiya. Del tiempo Otomano ke se aziya en el Palasyo del Sultan oy en diya se venden en las patiserias o se azen en kaza. Kada distrito tiene sus dulses spesyal. En el sud este, la Baklava i el Künefe; en la Mar Preta el Lazböreği i el Sutlach de Hamsikoy. De agora en delantre vos va ekrivir estas dulsuryas.
