El Djudio de Shakespeare

Köşe Yazısı
16 Haziran 2021 Çarşamba

Kreygo ke munchos meldaron o sintyeron el teatro ke eskrivyo Shakespeare, “The Merchant of Venice” – “El Merkader de Venezia”. En este teatro se trata de un djudio, Shylock, un personaje, no muy sempatiko, sin piyadad. En kurto, se dize ke este personaje amostra la parte antisemita de Shakespeare. Es ke es de saver ke, desde 1290 hasta la dekada de 1650, los djudíos no eran permitido de entrar o bivir en la Ingleterra. I se save ke Shakespeare no salyo nunka afuera de la Ingleterra. Alora, de ande se enspiro para figurar Shylock en su livro?

La semana pasada meldi un artikolo ande se tratava de una pretensyon sovre este kavzo.

Malgrado esta enterdiksyon, solo los marranos / anusim, djudios de Espanya i Portugal ke se aviyan konvertido al Kristiyanizmo solo por la forma para evitar la muerte, fueron bienvenidos en la Inglettera. Syertos akademisyenes afirmaron i spekularon ke el modelo de William Shakespeare para el Shylock del merkader de Venezia era el Dr. Rodrigo Lopez, un marrano akuzado de traisyon kontra la reyna.

Esta es su istorya. Nasido en Crato, Portugal en 1525, el Dr. Lopez se establesyo en Londres en 1559. Pratiko la medisina en el ospital St. Bartholomew i tuvo munchos pasyentes famozos i eskojidos. En 1586, el Dr. Lopez fue nomado el doktor-shef de la reyna Elizabeth I.

La politika en la korte en el tyempo de Elizabeth era kompleksa i entrefikado, i las relasyones enternasyonales eran komo un labirento de alianzas. La Inglaterra protestante i la Espanya katolika estavan kontinualmente bushkando remedyos para amostrar sus superioridades i todas las posibilidades eran empleados. Komo parte de una investigasyon sovre un komplo para asasinar Dom Antonio, el pretendiente al trono portugez (ke estava bivyendo en la Inglaterra), el Dr. Lopez fue akuzado por Robert Devereux, el segundo kont de Essex, de konspirar kon los espanyoles para entosegar a la reyna.

La evidensya kontra el Dr. Lopez fue ekstremamente livyano komo se dize solo bavajadas. Ma, despues de torturas en la Torre de Londres (el famozo London Tower), el Dr. Lopez fue ovligado de konfesar ke el fue abordado por los espanyoles para entosegar a la Reyna, ma solo kuando se aserko de la Korte Espanyola kon el buto de espionaje en favor de los britanikos. Malgrado esta konfesyon, Lopez fue kondenado. Despues de kuatro mezes de ezitasyon devido a sus dubyos sovre su kulpabilidad, la Reyna afirmo el orden de egzekusyon. El 7 de Junio de 1594, el Dr. Lopez fue enkolgado, dekapitado i el puerpo despedasado.

Las kestyones i dubyos sovre el Dr. Lopez estan kontinuando asta oy. No importa ke tan fuertes eran sus protestas de inosensya o de kreyensas relijyozas  (se deklaro publikamente ser buen kristiyano), el Dr. Rodrigo Lopez kedo markado para syempre en la istorya komo el mediko djudio ke kijo entosegar a la Reyna.

Siz de yorumunuzu yapın

Tüm Yorumları Görün