Kontan ke avia un Rey muy fuerte. Un dia envito a todos sus keridos a una fiesta muy grande. En esta fiesta todos se asentaron, komyeron, bevyeron i lo alavaron a el Rey. Despues de syete dias todos se fueron a sus kazas kontentes i alegres. El Rey se aserko a sus muy muy serkanos i les disho. “Kero ke estesh kon mi un dia mas.” I los serkanos kon grande plazer kedaron kon el Rey un dia mas.
Esta estorya asemeja a la fiesta de Shemini Hag Atseret. Durante Sukot en el tiempo de el Bet Amikdash se azia sakrifisyos para setenta puevlos. Estos sakrifisyos se yamavan “Shelamim.” Estos sakrifisyos eran para ke esten todos los puevlos en pas. Kuando termina la fiesta de Sukot en Oshana Raba, el Todo Poderozo se aserka a los Djudyos i los invita a kedar un dia de mas. Este dia es un dia spesiyal entre Yisrael i el Todo Poderozo.
Esta fiesta es tambien el empesijo de las orasyones de Invierno. En este dia komo mos embeza la Gemara en Taanit se empesa a nombrar las luvyas en la Amida. “Mashiv aruah umorid ageshem.” La Gemara mos dize esto es solo nombrar. Despues de un sierto tiempo empesamos a demandar luvyas yenas de bendisyones.
Despues de la fiesta de Shemini Hag Atseret, tenemos la fiesta de Simhat Tora. El dia ke kompletamos de meldar la Ley santa i empesamos de muevo. Esto sinyifika tambien la kontinuasyon de el estudyo de la Tora ke no ay fin. En este dia es uzo de azer “Las Akafot.” Kantar kantes alegres i baylar kon los Sifre Tora.
Todos nozotros despues de estos dias yenos de alegria mos vamos a nuestras kazas para bivir nuestras vidas kon repozo, pas, salud i prosperidad. Estamos siguros ke el Todo Poderozo resivyo nuestras orasyones i esklamasyones. Rogamos tambien de nuevo para una buena anyada.
Shabat Shalom i Moadim Lesimha
