Kuando pasa el diya de Kipur, los ijos de Yisrael estan muncho mas kontentes i alegres. Porke la tradisyon mos embeza ke en el diya de Kipur se perdonan los pekados. I despues de este diya, mos aprontamos para la fiesta de Sukot. Es una mitsva la noche ke salimos de Kipur de empesar a fraguar la Suka para la fiesta de Sukot. Komo esta eskrito en el Pirke Avot, una mitsva avre la puerta de otra mitsva.
Sukot se yama el tiempo de alegrar. “Zman simhatenu.” El savyo grande Rabi Hayim Palachi (Z’TsK’L’) de Izmir mos eksplika el biervo “alegriya” komo deve de ser. En la Suka mozotros mos alegramos porke estamos afirmando una mitsva muy grande. Mos akodramos de las maraviyas ke les izo el Todo Poderozo a muestros padres siempre i kuando estavan en el dizyerto. El Rav Palachi (Z’TsK’L’) de bindicha memorya dize ke en la Suka devemos de resivir musafires. El mos embeza de resivir a los savyos, a las bivdas, a los guerfanos i a los konvertidos en la Suka. Sigun ansi el Santo Bindicho El mos alegra a mozotros, a muestras famiyas i a muestras kriaturas.
En esta fiesta es uzo de orasyonar kon el Lulav. El Lulav tyene el Etrog, el Adas, la Arava i el Lulav. Esto semboliza ke el puevlo Djudyo esta aunado en orasyonando i felisitando las fiestas. El Rav Palachi (Z’TsK’L’) mos traye una eksplikasyon sovre una partida de el verso ke esta en Teilim 137 en su livro “Akatuv Lehayim.” “Aale et Yerushalayim – suvir a Yerushalayim.” El biervo “Aale” semboliza tambien ke en el tiempo de el Bet Amikdash en las fiestas de Sukot, Pesah i Shavuot todos se ivan a Yerushalayim a el Bet Amikdash. Esto se yamava “aliyat aregel.” Este biervo tyene las letras de los “arbaat aminim” en el Lulav ke orasyonamos en Sukot. La letra “Alef” semboliza el Etrog. La letra “Ayin” la Arava. La letra “Lamed” el Lulav. I la letra “He” el Adas.
Mos eksplika el Rav Palachi (Z’TsK’L’) uno ke orasyona kon el Lulav es komo se estava indo a Yerushalayim a el Bet Amikdash a el servisyo ke aziyan aya.
Komo estamos vyendo la fiesta de Sukot es una fiesta de estudyar la Ley, de alegrar kon los musafires, de orasyonar en nombrando la orasyon ke egzistiya en el Bet Amikdash.
Rogamos ke se frague presto el Bet Amikdash en Yerushalayim i ke torne la “avoda” ke es el servisyo santo en los diyas de Mashiah, amen.
