Fin agora vos eskrivi las salatas, las supas i las dulsuryas kaji de 40 paizes del mundo ande mos fuimos i los gostimos. Lo bueno i lo mijor de las dulsuryas del paiz ande esto bivyendo dainda no vos eskrivi. Para eskapar esta seria vos va kontar sovre las dulsuryas de Turkiya. Me vash a dizir, komo se dize en Turko, “Tereciye Teremi satıyorsun”. Ya lo se ke savesh tambien i a vozotros kije darvos savores en meldando. Komo se save, Turkiya tiene 7 distritos. Kada distrito tiene diferentes dulsuryas espesyales. Por egzempyo, el Sutlach puedesh topar en kada sivdad. Ama el mas famozo es el del distrito de la Mar Preta en Trabzon Hamsi koy, el Kunefe de Antakya es el mas famozo del paiz; kuando se dize Baklava i Katmer vine al tino de todos Gaziantep. Komo estos todas las sivdades tienen unos dulsuryas ke son famozas. En İzmir, en el mez de Ramadan se kome Zülbiye. En Urfa, despues de komer te trayen el dulse ke se yama Shıllık. En Balıkesir se topa Hoshmerim, en Antalya Tahinli Kabak tatlısı, en Adana Bici bici. El espesyal de Izmit es el Pishmaniye. Estos dulses en kada sivdad no se topan muncho. Solo se nombran kon las sivdades ke son famozas. Aryento del anyo no se topa el Gullach. Solo en Ramadan se aze i se topa en el paiz entero. Siguramente la kultura de los distritos por esto es muy emportante. Del tiempo de los Otomanos mos kedo munchas reseftas del Palasyo. Kada mued aparejavan diferentes dulsuryas. Dulsuryas ke se aparejan kon leche, komo Keshkul, Kazandibi, Tavukgöğsü, Malebi de agua, dulsuryas de frutas, komo dulse de Bimbriyo, dulse de Kalavasa, dulse de Kayısı aryento inchido kon kaymak i Igos sekos kon muez aryento ets. Tambiyen kon las frutas azen Kompostos i Hoshaf. Deke no se, en el palasyo ande biviya el Sultan los gizandones aziyan dulsuryas kon nombres “Erotikas” komo Dilberdudağı, Vezirparmağı, Hanım Göbeği. Estas dulsuryas se preferan komer kon Kaymak. El Tulumba Tatlısı i la Halva es komo nada ke aparejavan en el mupak. El Badem Ezmesi konosemos komo Masapan dizen ke se ambezaron de los Sefaradis ke vinyeron de la Espanya. El dulse Cezerye se apareja kon Karota i 40 modos de espesyas, kokonat i diferentes frutas sekas se buyen kon asukar i despues ke se kozyo metiyan aryento de kyulas i el Sultan aziya distribuir a los Djenisarios para ke tengan fuersa. Cevizli Sucuk ke se aze kon muez i se mete en rango al ilo i ke se unta al pekmez es muy enteresante. Tambiyen i este dulse dizen ke da fuersa.
Los Turkos kuando tienen Meldado ke se dize Mevlut de un paryentes aparejan Halva de Semola o Lokma. Pestil en Anatolia dan a los ijikos. La savor es un poko dulse i un poko agro porke se apareja kon frutas komo uvaz, avramilas, igos i kayisi. Despues ke se kozyo lo trespizan, por esto lo yaman Pestil. Este karar ke vos konti las dulsuryas en el mundo entero se konose Turkiya kon el dulse Lokum ke se yama Turkish Delight.
