Yosef Koén
Traduksión del ebreo: Aldo Seví
Kon la prezensia del mayor de Petah Tikva, Rami Greenberg, el direktor del Sentro del Patrimonio Djudió de las Komunidades de Salónika i Grecha, Roni Arania, el miembro del komité direktivo, Berti Ventura, meraklís del ladino, miembros de la famiya de Matilda Koén-Sarano i djente ke onora su memoria, día de alhad, el 11 de enero 2026, se inoguró en Petah Tikva un kaminiko (lane) ke yeva su nombre. Sozdé, en el kavzo de Matilda Koén-Sarano, este tipo de komemorasión no es tan importante – Matilda Koén-Sarano deshó más de 50 livros en mas de diez linguas, partisipó en dizenas de konferensias internasionales i entrevistó a sienes, pue’ser miles de personas, para arekojer kuentos folklórikos en ladino, lo ke la elevó a la pozisión de "Koenesa Grande del Ladino" o "Reyna del Ladino".
Portanto, la Munisipalidad de Petah Tikva fue la primera en adjustar un kat mas a la memoria de Matilda Koén-Sarano. Asta oy, solo los ke se interesavan en la lingua i la kultura de los djudiós ladino-avlantes meldavan sus livros, utilizavan su diksionario, gizavan kon la savor del ladino de su livro de rechetas, sintían las kantikas, konosían su ovra i su importansa para el mundo djudió sefaradí. De agora adelantre, grasias a la komemorasión en Petah Tikva, munchos mas van a konoser la kontribusión de Matilda Koén-Sarano al mundo kultural djudeo-israeliano.
Ay razón ke la komemorasión tuvo lugar en Petah Tikva. Es en Petah Tikva, en el Sentro del Patrimonio Djudió de las Komunidades de Salónika i Grecha, Aaron Koén, k.e.p.d., ke fue Direktor Jeneral de la Autoridad Nasionala del Ladino, i Matilda penaron para prezervar i kultivar la rika kultura de los djudiós sefaradís de los Balkanes. Komemorar a mi madre en un lugar públiko en el Estado de Israel es serrar un sírkolo. Matilda Koén-Sarano nasió en la Italia en el seno de una famiya de orijín turka, desendiente de los ekspulsadosde Espanya. Endjuntos kon sus padres, Alfredo i Diana Sarano, i su ermana Vito, k.e.p.d., sovrebivió el Olokosto, grasias a una famiya kristiana i a un papaz ke los eskondieron asta sus liberasión, en agosto de 1944. El mez pasado, mas de 80 anyos después de akeya maravioza estoria de salvasión, el Estado de Israel rekonosió a Gino Ciaffoni i a su mujer Annetta Peri, ke eskondieron a mi madre i a su famiya i al papaz Sante Raffaelli. Eyos resivieron el títolo de “Djustos entre las Nasiones” de Yad Vashem. El rekodro del Olokosto i el fakto ke lo tiene sovrebivido izieron a mi madre dedikar su vida a prezervar la kultura del ladino.
En la seremonía, la ermana de Matilda, Miriam Raymond, prezentó al mayor el diario eskrito por su padre, el Dr. Alfredo Sarano, sove las eksperiensas de muestra famiya en el Olokosto.
