Por la primera vez en dos anyos, las famiyas en Israel finalmente estan pudiendo abrasar sus keridos duspues sus liberasion de kaptivita.
Es un momento alegre i tambien una tristeza inimajinavle. Ma, mezmo ke el retorno a kaza trusho una grande relieve, tambien endika el empesijo de un largo i komplikado proseso de sanasion, tanto para los rehenes i para los ke los estavan asperando.
Segun la Doktora Ofrit Shapira-Berman, psikanalista israeliana, los rehenes liberados agora son komo bebes prematures. Tienen menester de ser mirados kon atansion i kompasion. Kon tiempo, pueden azersen mas inkietos i la trauma empesa a salir en medio.
Ser pariente de un rehen tambien no es fasil. Los rehenes salieron de los tuneles ma los tuneles dainda estan ariento de eyos. El grupo de alkavo va ser kurado por el estado del paiz durante bastante tiempo. Van a ser mirados de la vanda fizika, i mental tambien.
Los parientes amostraron muncho koraje i rezistieron asta agora, i no pudieron dedikar tiempo a sus propia dolor i trauma. Todos eyos tambien estan traumatizados. Tienen menester de muncha ayuda para pueder tomar el kontrol de los ‘va i vienes’ i los semptomes traumatikos de sus ijos. Es muy difisil de ser pariente de un rehen ke fue liberado. Todos los rehenes eksperimentaron traumas muy similares.
Kaje todos estuvieron mantenidos debasho la tierra. Se les privo la komida, les dieron muncho manko de la kantidad ke una persona sana puede komer. Lo ke todos los rehenes kontaron es el teror ke sintieron dia i noche. Ya savian ke puedian ser asesinados en kualsiker momento.
Siempre pensamos ke las mujeres sufren los mas negros abuzos, ma a lo ke parese, los ombres tambien sufrieron abuzos orivles. Munchos preferaron ‘alesharsen de la realidad’ para sovrebivir. Probablemente van a tener eshuenyos negros i difikultad para dormir. Si perdieron amigos serkanos o parientes, o si fueron shaet a atrosidades terivles, los semptomes traumatikos van a ser mas terivle.
Todo esto va salir en medio poko a poko. Va tomar tiempo, no solo sanar los rehenes, ma tambien entender ke karar orivles fueron sus eksperiensias. Los primeros dias probablemente van a ser los mijores, porke duspues, todo va ampesar a agravarse. Los ke fueron liberados mas antes dainda estan sufriendo. Ay muncho de azer. Sanarsen por entero va tomar una jenerasion.
Ma esta vez, la trauma no es solo por kavza de lo ke afito el 7 de oktobre. Tambien todos estan aravyados kon la armada porke la armada arivo ocho oras duspues ke los teroristos empesaron a atakar. Peryeron konfiensa en la armada. La armada siempre fue komo un padre fuerte i protektor. Va ser difisil de reparar este puente de konfiensa. La sola manera de rekonstruir este puente de konfiensa va ser en los futuros momentos kuando la armada va reushir a protejar sus kompatriotos.
