Esto eskrivyendo este artikolo de la otra parte del mundo. A esta aedad no avia vijitado dainda el Japon. Avia sintido i meldado ke era el payiz el mas karo del mundo. Avia una organizasion de viyaje para la Korea del Sud i el Japon; i desidimos kon mi mujer ke deviamos de realizar este viyaje. Munchos anyos antes tuve la posibilitad de irme a la Korea para merkar syertas makinas ke servian para la produksion de syertos ilos. Dospues de una syerta aedad no es muy fasil de azer 15.000 pasos kada diya. Los anyos dalkavo komo muestro payiz, la Turkiya esta karo, mizmo muy karo; ke “el payiz el mas karo” kreo ke esta mas barato ke la Turkiya. Para las vistimientas de mujeres, ombres i kriaturas ay una syerta marka “Uniqlo” ke es muy renomada. Reelmente no savia ke era una marka Japoneza. I vijitar i merkar de este magazen es una aktivitad del turizmo Japonezo. Komo tengo un echo ke es sovre el tekstil, este magazen i sus presyos baratos me entereso muncho. I entendi ke en Turkiya vamos a tener problemes muy emportantes para la eksportasion de produktos tekstiles.
Durante la semana dalkavo el evenimyento el mas emportante fue lo ke esta afitando en Israel i Gazza. Reelmente una desgrasia. Sin dinguna objeksyon kale dizir ke todo modo de gerra no deve de ser preferada. Ma para la seguridad de un payiz, de vez en kuando el solo remedio puede ser es de gerrear.
No se kuando tyempo va turar esta gerra. Ma va dar muncho danyo. Espero ke se va terminar en poko tyempo. La seguridad de Israel i el futuro de la umanidad va ser determinada en este punto del mundo.
