Dospues de 18 ocho diyas ke pasaron dospues de las desgrasias ke bivieron i bivimos los Israelyanos, dainda en las televizyones turkas estan avlando ke los djudios son muy fuertes en los Estados Unidos. Ya savemos ke la populasion Djudia en los Estados Unidos (una partida son Israelianos) es de 2 por syen (7 miliones en 350 miliones) del puevlo Amerikano. I un militario retretado esta avlando en la televizyon i esta dizyendo ke tyenen una influensa de 30 a 40 por syen en el derecho, en el parlamento i en todo modo de echos ke influensa el puevlo. Los devemos de apresiar.
Ay syertas personas mizmo muzulmanos ke estan eskrivyendo la kompareson de los Djudios kon los Muzulmanos. Estan avlando de los premios Nobel ke resivyeron, azyendo la komparezon de sus populasyones. Ya se save ke biven 17 milyones de Djudios en el mundo i la populasion de los Muzulmanos es 2 milyardas ke son 120 vez mas muncho ke los Djudios.
Se esta avlando ke ay videos sovre lo ke izyeron la djente del Hamas a los Israelyanos el 7 de Oktobre kuando entraron en las tierras Israelyanas. Terrivle, muy terrivle. No tengo mizmo el koraje de eskrivir lo ke afito en estos videos.
Mizmo si dizen ke Netanyahu esta mas fuerte dospues de esta kriza MUY EMPORTANTE, kreo ke munchos Israelyanos no keren mizmo sintir el nombre de Binyamin Netanyahu. Kon su politika izo lo ke kijo, i es por la primera vez ke Israel pyedro su abilidad en la seguridad de sus tierras.
Malorozamente Israel va entrar en las tierras de Gaza i estan dizyendo ke esto va turar mezes i mezes, porke no keren mas ke el Hamas egzista.
