Kada anyo las Komunidades Djudias de los payizes Evropeos organizan el primer alhad del mez de septembre “El diya Evropeo de la Kultura Djudia “. I mozotros, los Djudios Estanbollis en el empesijo lo realizimos en la mizma data. Dwspues los dirijentes disheron ke esta data no era muy konvenivle para muestra komunidad i trokaron de data. Agora lo realizamos un alhad de Oktubre o Novembre. I ayer era el diya asemejante. Un grupo de dammas enkavesadas por la Sra. Ceni Kanditan kon muestra direktrisa, Nisya Allovi lavoraron unos kuantos mezes para realizar esta aktivitad empesando a las onze i eskapandose a las 5, 5.30 de la tadre. Yo malorozamente no pude partisipar porke estava en la Ingleteria kon mi famiya, ma estava sigiendo diya entero todas las aktivitades.
Verso las 5 en Beyoğlu / Pera una terorista desho una chanta kon una bomba. I kuando uvo la eksplozion malorozamente uvo 6 muertos i mas de 80 firidos. Una desgrasia. Komo tenemos bastantes prekosyones i estamos siempre en alerta, immediatamente dimos fin al konserto del bando ke se realizava en la kaye djusto delantre del Neve Şalom.
En este diya serka de 3.000 personas vinieron a vijitar el Muzeo Djudio i sus aktividades. Avia munchas konferensias, una boda realizada por los artistos de teatro. Es la semana ke viene ke vos va kontar lo ke afito.
Este diya es muy emportante porke los ke no son djudios tyenen la posibilitad de saver mas i mas sovre los djudios.
Kero rengrasyar todos los ke dyeron konferensias, i todas las dammas ke mos ayudaron en esta organizasion. Lo mas emportante era los dirijentes de muestro muzeo Djudio.
