Todos saven ke me entereso sovre todo modo de Djudaikas Otomanas i Turkas en muestro payiz. Komo la valor de la Lira Turka no esta muy famoza, los ke partisipan de otros payizes tyenen mas muncho posibilidad de merkar el objekto o la karta o la efimeria. Es muy enteresante ke dainda es posivle de topar munchas kozas sovre los Djudios Turkanos en estas vendidas ke se realizan en el internet. El Imperio Otomano i la Turkia tyenen una istoria bastante rika sovre la Vida de los Djudios i del Djudaismo. La semana ke viene ay una vendidad en el internet. I es la koleksion de muestro kerido amigo, ke su alma reposa en Gan Eden, Avram Abuaf de İzmir. Malorozamente me ambezi muy tadre su muerte. Ya savia ke munchos anyos koleksyonava kartas, eskritas i dokumentos sovre İzmir i sovre los Djudios de İzmir. Mizmo kuando avia un loto enteresante sovre Izmir o los Djyudios de İzmir, le telephonava para ke tenga haber. Reelmente ay munchas kozas ke me enteresa i ke enteresa la Komunidad de İzmir. En primero telefoni al prezidente Sevinti i le demandi si tenia haber? Malorosamente no tenia. I le demandi si kerian merkar syertas kozas. Van a tener en la mizma kaleja un alay de sinagogas ma para eksposar kreo ke no tyenen bastante kozas. A la fin me dyeron un budjeto para ke les merke syertos dokumentos. En las keilas ke estan restorando kreo ke deven de ekspozar syertos objektos i syertos dokumentos para reflektar la vida rika del Djudaismo de İzmir.
La semana ke vyene vo estar en viyaje i va pueder estar kon mis kriaturas, kon mi yerno i kon mi inyeta. Ma embiyi un mesaj dizyendo ke alhad dos oras va estar okupado kon esta vendidad. Kero ver lo ke va afitar i kualo puedo merkar por muestro Muzeo.
En dos mezes tenemos las eleksyones en las fondasiones de muestra komunidad, en Estanbol i afuera de Estanbol. Ya se ke las eleksyones se realizaron solo para la Komunidad de İzmir i las eleksyones por las otras komunidades se van a realizar verso la fin del mez de Disembre. Kreo ke vamos a ver syertos trokamyentos. I puedeser vamos a topar muevas personas en diferentes fondasiones. No se si todos estan kontentes de estos trokamyentos o no. Dainda semos una komunidad de 16.000 almas. I tenemos 16 o 18 sinagogas ke fonksyonan. No es muy kolay ke estas todas fondasyones sean dirijadas solo por el Gran Rabinato. Ma kale ke todas estas fondasyones sean dirijadas por personas kapaches de azer este echo.
Ay anyos ke el Governo no mos esta dando el derecho de azer eleksyones i en syertas fondasiones reelmente tenemos problemes bastante emportantes. Espero ke estas eleksyones se van a realizar por el bien de muestra Komunidad.
