Silva Filiba
Madres Judiyas ke aparejan el Shabat kon amor i alegriya…
Le avriremos la puerta i la envitaremos a entrar a muestra Novya i Reyna “Shabat a Malka”, kon los Anjelos de repozo i de pas.
El Shabat es vuestro, ermanas keridas, kada una de sus fachas, de sus nombres tiene figuras de mujer, la Novya, la Reyna, la Shehina, la Sefira Malkut (Reynado)…
El Shabat ampesa kon la luz de las kandelas ke la madre Judiya asyende i arelumbra la kaza. El “Eshet Hayil” ke melda el marido a su mujer (Mujer de vertud ken la topara) es una manera de alavar a la mujer por sus penas i su vertud enverso su marido i su famiya. La meza de Shabat mos akodra el “Mizbeah” del Beit-Amikdash ke despues de su destruksyon kedo komo el sembol de su santedad.
Kada uno de sus elementos ke ornan el pranso tiene una valor sembolika. Los dos panes (Halot) son las dos porsyones de Magna ke kayo del sielo en el dezyerto el Viernes antes de Shabat.
El manteliko ke los rekuvre es el rosiyo ke kayiya enriva la Magna. Las kandelas akodran la menora ke kemava en el Beit-Amikdash. El vino reprezenta las libasyones ke se versavan en santedad. La sal es sinyo de eternitad (no se bozdeya nunka) i mos akodra el punyado de sal ke se dava al Kohen Hagadol por los sakrifisyos. El Kidush, de sus primeros biervos mos da un mesaje emportante. YOM ASHISHI VAYEHULU ASHAMAYIM, las kuatro primeras letras de estos kuatro biervos YUD HE VAV HE forman el nombre ke no se prononsa del Santo Kriyador, komo si el aviya metido su sinyatura en su ovra. El shifro de noche de Shabat es 70; el primer paragrafo del kidush ke avla de la kreasyon del mundo tiene 36 biervos, viene despues la bendisyon sovre el vino SAVRI MARANAN (kon vuestra permisyon mis Maestros). Este vino es para la vida u la muerte. Dizimos de una bos LEHAYIM = para la vida! El Vino YAYIN tiene una valor numerika de 70. El sigundo paragrafo del kidush kompozado por los Hahamim, avla tanbien de la salidura de Ayifto. El nasimyento de muestro puevlo tiene tanbien 35 byervos lo ke aze del Kidush el shifro 70.
La Shehina i la Sefira Malhut tanbien son atadas al shifro 70. El Shabat ke ampesa de Erev Shabat, Leil Shabat mos avla de la kreasyon, el Shabat de la demanyana mos avla de la revelasyon de la Matan Tora, Shabat despues de midi de la Redempsiyon (epoka del Mashiah). Tres tiempos de la eternidad de muestro puevlo en un diya, diya de Shabat es el sinyo de Santedad, de Libertad, para todos es un tiempo en el tiempo, una ora de Gan Eden en las oras de pena en la semana, un tiempo afuera del tiempo. El Shabat mos da una Neshama Yetara (una alma otra). Mos akodraremos de la Kupa (kos) del Kidush ke tiene la mizma valor numerika ke Elohim, 86.
Ke tengamos siempre Shabat de pas i de amor, de ermandad, de armoniya, de buendad kon alegriya de korason sin muestras ansyas ni de Corona. Shabat Shalom.
