Komo se embiya los livros a los Estados Unidos o a Israel

Silvyo OVADYA Judeo-Espanyol
27 Temmuz 2022 Çarşamba

    Los dos anyos dalkavo, El Sentro Sefaradi d’Estanbol esta azyendo un grande lavoro para pueder propajar los livros ke esta publikando, mizmo los livros ke fueron editados por el Şalom, el Muzeo Djudio de Turkiya, o otras kazas ke publikan livros sovre la kultura sefaradi i muestra lingua: el judeo-espanyol. Ya savemos ke la Turkiya es muy barato en el kampo de publikasion de livros komparando a los Estados Unidos o los payizes Evropeos.  Ay kuatro o sinko mezes ke la Posta Turka dyo karar de embiyar todo modo de livros, de artikolos publikados mizmo paketos de objektos kon una tarifa diferente ke es organizada sovre el dolar amerikano i el euro, i estamos pagando sinko mizmo sesh vezes mas karo ke antes. I esta tarifa troka kada diya kon el dolar Amerikano. Ya savemos ke el dolar amerikano o el Euro esta mas valorozo kontra la lira turka, ma esto no esta kompensando lo ke estamos demandando de muestros klientes. No keremos ke la djente pense dos vezes antes de merkar un livro de muestra asosiasion.

   Ya se ke munchos anyos, syertas kompanias ke publikavan revistas medikal i ke distribuiyan al mundo entero preferavan la Turkiya porke la posta Turka era bastante barata. En el mez de desembre tratimos presios kon kompanias de transporto komo DHL o Fedex. Ma unos kuantos mezes dospues trokaron los presios dospues ke el presio del petrolyo pujo. La semana pasada teniyamos un embiyo a Uruguay. Los dos livros  demandados  pesavan un kilo i syen gramos i la posta demando mas munchas paras ke la para ke enkasimos para los livros i su ekspedision.

   Malorozamente kuando la moneda no esta fiksa i syertas institusyones trokan de karar kada punto, no es muy fasil de organizar un echo para una perioda larga. Ya se ke estamos pasando una perioda difisil ma no vamos a demoralizarmos. Porke uno de los mas emportantes butos de muestra Asosiasion es de publikar livros sovre muestra Kultura i muestra Lingua i de pueder  propajar estas publikasyones.

   Reelmente topimos una rezultado perfekto kon el Amaneser i tenemos bastantes abonados via el internet. I es enteresante ke ay syertas personas ke lo resiven de dos maneras porke les plaze la golor del papel koma mi.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR