El Bayram en Turkiya

Silvyo OVADYA Judeo-Espanyol
20 Temmuz 2022 Çarşamba

  En muestro payis los dos bayrames – Ramadan i la fiesta de los kodreros - son muy emportantes en la vida del lavoro i de las vakansas. La semana pasada no puditesh meldar el Şalom porke ay munchos anyos - mas de 30 anyos - ke los ke lavoran en el Şalom dyeron karar de no publikar solo dos semanas en un anyo el semanaryo Şalom. Las dos semanas de los Bayrames. De ke? Porke es muy difisil de pueder publikar i de distribuir el semanaryo en la semana de Bayram. No se si lo savesh; ma 60 o 70 por syen del semanario es distribuido por personas ke sirkulan en las kayes kon araba. Si no; no es posivle ke los lektores resivan el semanaryo en dos o tres diyas. Es en el 1988 ke di karar de distribuir el Şalom kon personas ke devian de sirkular todas las kayes de syertos barrios: Şişli, Nişantaşı, Maçka, Gayrettepe, Levent, Caddebostan, Göztepe, Tarabya, İstinye, Yeniköy i dospues Göktürk i Kemerburgaz. Ya se ke no alkansi a meter en sira todos los barrios… En los anyos 90-95, el Şalom tenia mas munchos abonados ke oy. Puede ser teniyamos una populasyon mas de oy en muestra sivdad i en muestro payis. Kale achetar ke esta jenerasion no tyene mas la kostumbre de meldar diaryos o semanaryos. Eyos preferan de segir estas medias en el internet. I espero ke es lo mizmo por el Şalom. El Şalom no topo el koraje de publikarlo por internet kon paras. Lo aprovimos kon el Amaneser i muestro amigo Yuri Sason de Espanya mos ayudo muncho, demandando a syenes de personas ke sean miembros del Amanesr sovre el internet. I reusho. Reelmente, no se egzaktamente kuantas personas meldan el Amaneser via internet. Ma es muy emportante para mozotros. Es muy emportante de punto de vista material. I una gazeta o un klup es poderoso si tyene bastantes meldadores o myembros. Porke kada uno/una deve de pagar paras para ser meldador o miembro de este semanaryo o de esta asosiasion.

  Este Bayram estava en la Büyükada. I toda la djente ke bive en Estanbol vinieron a la Büyükada porke el Prezidente del Payis anyos antes dyo karar ke toda la djente vengan a la Ada durante el bayram sin pagar paras para el vapor o el motror. I en la ada lavorimos para arekojer sinyaturas para dizir ke no keremos mas ke las personas alkansen a vinir a las Islas sin pagar paras. Reelmente es una desgrasya. I esta vez vimos personas ke rompyeron mizmo las puertas de las guertas para entrar a la guerta de syertas kazas para azer piknik i mizmo tuvyeron el koraje de demandar: “si puediyan emplear las privadas”. Reelmente una desgrasia. Ya savemos ke anyos los ke biven en la isla Kınalı serka de la mar, noche de Shabat tornaron a sus kazas en Estanbol para tornar alhad a la tadre o lunes demanyana. No so ni kapitalisto, ni komunisto ma mi idea es ke toda persona tyene el derecho de bivir en una kaza, mizmo si esta serka de la mar. I dinguna persona no tyene el derecho de entrar aryentro sin permision. Ya savemos ke en syertas sivdades de la Evropa pagando los bilyetos de vapor, una partida es por la munisipalitad de este kazal, ma si dyeron karar, dinguno no tyene el derecho de desrepozar las personas.

 Espero ke va ser la mizma koza por las islas en Estanbol. Enveranada buena i klara.

 

Siz de yorumunuzu yapın

Tüm Yorumları Görün