Beaaloteha

Rav Yeuda ADONİ Judeo-Espanyol
15 Haziran 2022 Çarşamba

La djente ajena ke estavan kon los ijos de Israel (Erev Rav), dezearon munchas kozas sin menester. Kozas ke no se puediyan topar; solo en las sivdades povladas i no en el dizyerto. El puevlo de Israel sin apartar la diferensya ke ay de eyos a esta djente, i eyos yoraron dizyendo “ken nos dora a komer karne?” I enpesaron a rekordar de munchas kozas de muy poka enportansa ke teniyan en Ayifto debaldes. Myentres ke el mantenimyento ke teniyan en la mano ke era la magna, era una koza muy estimada en su saver i en su vista, en su limpyeza, ke en tenyendo esto en le mano no kaliya pensar por unas kozas de muy poka enportansa.

El puevlo se rekojeron en la puerta de su tyenda, famiyas enteras a yorar por este mal, ke les mankava todas estas kozas ke teniyan en Misrayim, en abondansia. Este konporto de la djente le desplazyo muncho a El Kriyador. Komo se olvidaron tan presto todas las buendades? Moshe Rabenu se topa en un estado de no pueder azer nada. El pensava ke la kulpa estava en el. Ke no esta savyendo giyar a el puevlo. El se kesha kon el Todo Poderozo dizyendo: “Ke pekado tuve ke me dates esta karga tan pezgada a no pueder suportar. De onde tengo yo karne para dar a komer a esta suma de puevlo ke estan yorando dizyendo: “Damos karne! Moshe Rabenu roga a El Kriyador ke si lo kere byen ke lo mate i no vera este mal ke no puede suportarlo.”

El Kriyador le dize a Moshe Rabenu ke por endelantre no va tener el esta kantidad de yugo kon el puevlo. Le enkomendo ke eskojga 70 personas de las savyos de Israel, ke son kompetentes de giyar a el puevlo. El Kriyador les va dar la fuersa ke rijan a el puevlo i le van a alivyanar el yugo de Moshe Rabenu. Le diras a el puevlo, le dize El Kriyador, ke se apronten para manyana i komeran karne en abondansa. Tendran de komer fina un mez. Ma ke sepan ke esta karne les va salir por la nariz. I antes de eskapar de komerla van a murir munchos de entre eyos.

Moshe Rabenu vyendo ke esta dadiva de la karne va ser por el mal de puevlo, le roga al Kriyador de arepintirse de esto dizyendo: “Una vez ke esta es unas vanedades del puevlo, eyos keren topar unos pretekstos”.

Moshe Rabenu konto a el puevlo ke El Kriyador ordena de eskojer 70 personas de los savyos del puevlo de las mas pertenesyentes de todos. Las aparo a el deredor del Mishkan. El Kriyador los favorizo i pozo sovre eyos su pofetiziya.

Entre las personas ke fueron eskojidas para esta misyon aviya dos personas nombrados Eldad i Medad ke los kualos kedaron en el real del puevlo i no fueron delantre del Mishkan komo las otras 70 personas: Estos dos personajes ke no les salyo el goral, por esto kedaron en el real i no fueron metidos delantre el Mishkan. Fueron profetizando, Moshe Rabenu fue avizado de parte su elevo Yeoshua ke estan profetizando en el real. El responde dizyendo: Ken sera ke todo el puevlo fueron profetas komo estas. El Kriyador izo arankar de la mar unas syertas aves nombradas Selav tanto era la muchidumbre ke se espandyo a el deredor de el real. El puevlo estuvo eskojendo dos diyas i una noche. Malorozamente ke este Selav fue por el mal del puevlo. Ainda tenyendo la karne el los dyentes, mando El Kriyador una mortaldad. En el entarvalo de un mez muryeron muncha djente del puevlo. Por esta razon se yamo este lugar Kivrot Ataava. Tombas de el dezeo.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR