HABIB GEREZ: UN ENNAMORADO DE GALATA

Silvyo OVADYA Judeo-Espanyol
1 Haziran 2022 Çarşamba

Es el myerkoles pasado ke me bushkaron del Barınyurt para dizirme ke Habib Gerez no esta puedyendo respirar. Una ambulans i imediatamente al ospital. Ma no alkansaron de meterlo en la ambulans. Unos kuantos diyas antes, meldo unas kuantas poezias al whatsapp. Dospues yamo la direktrisa Hatice del Oryom i le disho: “Estas prenyada i kero azerte regalo un fostan para la kriatura”. Un diya dospues les disho: "Kero unas kuantas anvelopes i kero dar moneda a las enfirmyeras”. Kreo ke tuvo el sentimyento ke se va murir. A esta aedad no se espantava de la muerte. I mos desho la vida  unos kuantos puntos dospues.

Dospues de dos oras, me fui al Barınyurt i tomi su telefon. No topi dingunos mirando ermano o Haskiya/Heskiya.. Esta vez bushki sovrino o "yeğen" en turko.Yo teniya el numero de telefon de su sovrino, Sabih porke avia merkado unos kuantos livros del Sentro Sefardi i avia un numero de telefon. Me ambezi ke era un numero de kaza. Topi el numero de Shela, otra sovrina i le di haber ke su tiyo Joseph Habib Gerez malorozamente mos desho la vida. Avlimos kuando puedemos realizar la seremonia de funerayes. I dospues de unas kuantas oras dimos karar de azer la seremonia en Kilyos, vyernes a las 11.00. Izimos todo lo menester i sinkuenta personas asistyeron a la seremonia. Reelmente mas muncha djente devian de estar prontos.

Deke me enteresi tanto? Komo so el prezidente de la Fondasion del Kinsentenario i komo Habib Gerez desho su kaza kon testamento a muestra fondasion, semos mozotros ke izimos todo el posivle para mirarlo de la mijor manera. Tres anyos en el Oryom; dos operasyones bastante emportantes, el primer en el Ospital Amerikano i el segundo en Medipol. Reelmente me espanti muncho kuando lo operaron en el Medipol. Disheron ke es una operasion de tres-kuatro oras i me telefono el mismo, mueve oras dospues. Komo reusho a avlar una ora dospues de la operasion. Reelmente estava en kudyado.

Gerez era un ombre ke bivyo kon el amor del arte. Las poezias i la pintura era su amor. Tomava un grande plazer pintando. I le plazia muncho meldar poezias. Tres kuatro diyas antes ke se muera dyo karar de meldar unas kuantas poesias al whatsapp.    

Sesh anyos antes, Gerez mos dyo kon testamento su kaza. Ken semos? Mozotros, la fondasion de 500 anyos. I devemos de konservar el edifisio komo el Muzeo de Gerez. Kreo ke vamos a reushir a realizar esto. Si alkansamos a fraguar la tarasa ensima del edifisio vamos a tener un kafe i en este kafe vamos a pueder mizmo ofreser pransos de komidas sefardis kon los tures de Galata.

Habib Gerez nasio en Ortaköy i dospues bivio en Şişli. Es kreo ke dospues de la muerte de su madre ke troko de kuartier i esta vez se fue a morar a Galata. I estuvo muy orozo aya.

Ya se ke tenia un entorno muy riko i la mas grande partida de sus amigos eran artistos i pintores. Kreo ke no alkansimos a avizar a todos los funerayes de Habib Gerez. Ke su alma repoze en Gan Eden!

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR