Tornando a Estanbol

Silvyo OVADYA Judeo-Espanyol
18 Mayıs 2022 Çarşamba

Oy diya de alhad, ay dyes diyas ke esto en Toronto. I esto tornando a Estanbol. Ay muncho tyempo ke no paso dyes diyas sin ir al echo o sin dinguna okupasion ke tyene raporto kon la komunidad. No vos pareska ke no embiyi mesajes para el Konsyerto ke vamos a realisar Alhad el 22 de Mayo en Edirne. Es la segunda vez ke mos demandan un piano. La vez dalkavo a la fin achetaron de emplear un piano elektroniko. Ma esta vez no fue achetado. A la fin topimos un piano en Edirne i vamos a embiyar un eksperto para azer el akord del piano. Reelmente ay munchas difikultades para realisar un evenimyento asemejante. Estamos kontentes i olvidamos todos los esforsos ke izimos kuando la djente da karar de vinir al konsyerto, o kuando mos dizen ke estuvieron muy kontentes.

Canada es un payis ande moran serka de 500.000 Djudios. I serka de los 190.000 moran en Toronto. Kreo ke ay todo modo de Djudios: Ortodokses, konservativos, reformistos i ay Habates. Me keria ir a una sinagoga. No topi una ke era serka del Otel ke se topava en el sentro del Downtown. I kreo ke las oras de las orasyones son diferentes en kada Sinagoga. Es los Rabis d’Estanbol ke azen las dos orasyones – Minha i Arvit – en el mizmo tyempo. En Estanbol es solo el Kal de Büyük Çorapçı Han ke aze solo la Minha. Porke la orasion de Arvit es muy tadre. Anyos antes kuando los diridjentes de la Komunidad mos fuimos a İzmir fue la mizma koza i diya de vyernes estavamos en una chika sinagoga ke se topava en el Kuartier Djudio ke oy en diya la mas grande partida fue restorada. I este modo a la tadre mos fuimos a la Sinagoga Shaar a Shamayim de Alsancak, no era la mizma ora d’Estanbol porke no teniyan el dover de azer la Minha.

Oy en diya no dimos dainda karar si esta Corona s’eskapo o no. Ay firmas aerianas ke desidieron de no emplear mas las karatulas-las maskas- porke esto no es mas una epidemia. No se ken tyene razon ma esta un problem para los ke azen atansion. Todos estan kon karatulas en los asansores de los oteles o kuando se estan suviendo a los taksis o a los Uberes. Oy tomando el avion, mi mujer no va ser muy kontente si la djente no estan empleando karatulas.

En la Gresia i en la Espanya, la djente se reposa dospues del medio diya i avren los magasenes a las 3 dospues de midi. Ma serran las botikas mas tadre. Diya de vyernes kije ver dos magazenes de livros ke se topavan en la kaleja del otel. I los dos estavan serrados a las 11 de la demanyana. Ay mizmo restoranes ke avren dospues de las 12. I serran presto. Reelmente es enteresante. Mi ijo i sus amigos disheron ke Toronto se espyerta dospues del medio diya. En Turkiya en muestro payis dizimos de vez en kuando ke la djente no lavora bien. No es djusto. Lavoran sin difikultades 10 oras al diya tomando lo ke meresen. En Toronto estos magazenes serran a las 5 o a las 6 dospues de midi.

Kero eskapar mi artikolo avizando una otra vez el konsyerto de Guy Mintus i su trio  ke se va realisar en Edirne el 22 de este mez. Ya puedesh kontaktar la Sinyora Emel 0535 3500778 para los detalyos de este evenimyento.

 

Siz de yorumunuzu yapın

Tüm Yorumları Görün