Dos evenimyentos en el Muzeo Djudio

Silvyo OVADYA Judeo-Espanyol
27 Nisan 2022 Çarşamba

  Despues de Shabat eskapimos la fiesta de Pesah. Para kada anyo mijorado. Sin tomar reflo, diya de Alhad en el Muzeo Djudio teniyamos dos evenimyentos. El primero era un filmo i un reportaje sovre la vida del Sinyor Moris Gabbay; un ombre ke fyesto sus 100 anyos 2-3 mezes antes. Un ombre reelmente muy valutozo. En akeya epoka estudio en el Robert College. Era en primero sempatisano ma despues reelmente aktivo en el partido politiko de los lavorantes (TİP). Despues ke tenia un echo de komersio lavoro por las Nasyones  Unidas en Turkiya i en diferentes payises de la Afrika. Este ombre de 100 anyos tyene reelmente una memoria muy remarkavle. Se akodra de todo. En el filmo konto los evenimyentos del 6-7 Eylül 1955. I en el interview lo ke le afito en el Varlık Vergisi kon sus paryentes. Estimaron 45.000 liras para su padre ke se avia murido i 10.000 liras a su madre. Mos konto ke sus amigos del Robert College ke fueron mayor de Estanbol i primer ministro de la Turkiya no tuvyeron el koraje de demandarle una koza sovre este kavzo. El ke era un verdadero sivdadino Turko. Puedeser ke era mas Turko ke munchos otros Muzulmanos ke estudiaron en la misma klasa. Le demandi por sus ermanos. No bivyeron en Turkiya i preferaron de bivir en la Ingeltera o la Fransia. Avia syertos mansevos ke estavan enkantados de ver el Sinyor Moris Gabbay. Despues del filmo i de la konferensia, dos ijikas ke estan estudiando en la Universitad del Bosforus vinieron al lado del Sinyor Gabbay solo i solo para felisitarlo.

   Oy en la sala de las ekspozisyones ke se topa debasho del Muzeo avia una ekspozisyon sovre el Olokosto. Una ekspozision organizada por los mansevos del Alef. Es una ekspozisyon muy emportante. No se si savesh; ma oy en dia ay munchas i munchas personas en Turkiya i en el mundo ke no saven ke entre los anyos 1939-45 los Almanes fueron kapaches de matar mas de 6 milyones de Djudios. I en Turkiya la Segunda Gerra Mondial se estudia en la klasa dalkavo del lise; i komo todos son okupados kon el egzamen ke para la entrada de las universidades, esto no se ambeza. I es reelmente una mankura muy emportante. Esta ekspozision la vijiti kompletamente; i demandi si avia syertas eskolas ke devian de vijitar esta ekspozisyon. Nisya me respondyo ke diya de lunes los elevos del Robert College devian de vijitar esta ekspozision. No avia una broshura ni un livriko para dar a estos mansevos. Avli kon los responsavles i van a aparejar un livriko en dos diyas  para dar a los ke van a vijitar esta ekspozisyon sovre el Olokosto.

   I van a saver ke la umanidad puede matar 6 milyones de Djudios en solo una perioda de 4 o 5 anyos. Espero ke la umanidad no va ser kapache de ver una koza asemejante en la istoria.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR