El Apartamento Barnathan i la famiya Barnathan

Silvyo OVADYA Judeo-Espanyol
20 Nisan 2022 Çarşamba

  Ay unos kuantos mezes ke el apartamento Barnathan ke se topa en Yüksek Kaldırım fue restorado i agora es un otel bien frekuentado. La semana pasada me bushko el Sinyor Jean Claude Barnathan ke bive en Paris i ke es enteresado en el pasado de su famiya. I fuimos endjuntos dos vezes. La primera vez en el Muzeo Djudio i la segunda vez, lunes demanyana en el kafe del Otel Barnathan. Un anyo antes, kuando me ambezi ke estavan restorando este edifisio topi la kompanyia ke lo estava restorando i enviti el patron al muzeo; i le demandi si puediya publikar un livro komo fue publikado durante la restorasion del “Kamondo Han”. Fue un livro muy reushido. El livro sovre los Barnathanes i el Edifisio Barnathan devia de ser muy emportante para muestra komunidad. Ya savemos ke es el Sinyor Nisim Barnathan ke fraguo este edifisyo. La famiya azia echos de moneda-bankieres, de komersio i eran fabrikantes de papeles de sigaros. Era kreo un echo muy enteresante en esta epoka. Ya savemos ke el Sinyor Boton, proprietaryo de Boton Han; ke oy en diya es Doğan Apartmanı i el era fabrikante de papeles de sigaros. Estuve en kontakto kon el Sinyor Jean Claude un anyo antes i me konto lo ke estava azyendo sovre el pasado de su famiya. Me ambezi ke ay Barnathanes en Arjantina, en los Estados Unidos i en Fransia. Reelmente es una famiya muy ancha. Ya mos ambezimos ke Nisim tuvo 16 kriaturas. I esto es la mas grande rikeza de la famiya. Su primera mujer era Dona Kordovero i despues se kazo kon una de los Camondos. Ma no tenemos bastantes provas. No se si tenemos los rejistros de los anyos 1850 o 60 para topar este kazamyento.

Devemos de ayudarlos para realizar este proyekto. Oy avlando kon el Sinyor Barnathan, estavamos endjuntos kon Elda Sason i komo ya savia ke se devia de ir a Paris en una semana le propozi ke aga un reportaje kon el Sinyor Jean Claude en Paris. I lo va azer. Publikandolo en el Şalom vamos a demandar a muestros lektores si konosen personas ke bivyeron en el Han Barnatan. Ya savemos ke los trenta anyos dalkavo era un apartamento deskayido. Ma en los anyos 30 o 40, devia de ser una maraviya de bivir en este edifisio. Ya savemos ke la famiya de “Bella Eskenazi” bivyo en este edifisio i lo konto en el filmo “Bella”.

Despues puedemos azer reportajes kon las personas ke bivyeron en este edifisyo. No es muy fasil de pueder topar estas personas ma kreo ke puedemos topar los ijos o inyetos de estas personas.

Ay bastantes dokumentos sovre el pasado de la famiya Barnathan i fotografias de la famiya.

I puedemos emplear esto todo para un livro. Ya savemos ke una damma eskrivyo un livriko sovre el edifisio i la famiya Barnathan. Ma kreo ke no topo apoyo, ni bastante material ni moral para pueder kontinuar este lavoro.

Espero ke esta vez vamos a reushir azer un livro asemejante.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR