Aldo Sevi
Una istoria ke kontan en mi famiya: Komo se salvó el primo ermano de mi grampapá de los Nazis, i komo arivó de Paris a Estambol en el medio de la sigunda gerra mondial kon su tapet turko…
El eroe de esta istoria es un primo ermano de mi granpapá, ke morava en Paris al tiempo de la sigunda gerra mundial. Puede ser ke nasió en Salonik serka de 1890, i emigró a Paris serka de 1910. Komo guadró sus dokumentos osmanlís kon los kualos arivó ayá, después de la okupasión almana de Paris en 1940, pudo kitar un pasaporto turko válido i kontinuar a bivir en Paris basho la proteksión del konsolato turko. En 1943, el governo alman informó al governo turko ke todos los djudiós turkos ke moran en Paris deven de "repatriarsen" a la Turkía, i ke ya no van a permitir a los djudiós kon pasaportos turkos de kedar en Paris. Alora el konsolato turko organizó el viaje kon treno de 700-800 djudiós de orijín turka i otomana de Paris a Estambol en el medio de la gerra.
Los djudiós mazalozos ke tuvieron esta oportunidad de salvarsen de la muerte i partir para Estambol, eran permetidos de yevar kon si solo una validja de kozas personales, sin parás, sin oro i sin artíkolos de valor mas ke unas kuantas djoyas vistidas por las mujeres. El primo de mi granpapá kijo yevarse una koza ke pudiera vender en Estambol en kavzo de nesesidad… Le vino una idea… Se fue a la gar kon el tapet turko grande i karo ke tenía en kaza… El ofisial ke kontrolava la djente k'estava suviendo al treno le dishó: “I kualo es esto? Esto no puedes yevar kon ti”. El primo le respondió: “Yo so muslumano, i esto es mi tapet de orasión”. El ofisial le disho: “No kreo ke sos muslumano. Amostrame komo azes la orasión”. El primo no se shashireó… Estiró el tapet embasho; adjuntó las manos i murmureó unos kuantos biervos en turko; se metió de djinoyos, i empesó a menearse komo en la orasión muslumana… Ansina lo desharon suvir al treno kon el tapet… I kon este tapet arivó a Estambol después de unos kuantos días.
