La Balerina Lili

Silvyo OVADYA Judeo-Espanyol
29 Aralık 2021 Çarşamba

   El 19 de desembre, diya de alhad estavamos en el Torun Senter, muevo mall fraguado al lugar del Stad Ali Sami Yen - el stadium de Galatasaray - i en la entrada de los sinemas tyenen una grande sala. Aya, aviya una prezentasion del livro de Meri İstroti sovre la balerina, Lili Barokas. El nombre del livro es “Balenin Çınarı: Madam Lili Barokas’ın hayatı” “El platano del bale: la vida de Lili Barokas” (En turko para uno o una ke tyene serka de syen anyos se dize "çınar / platano"). Lili i Meri, las dos estavan aya para sinyar el livro. Era una aktividad realizada por Meri i el Muzeo Djudio. Es eya ke se okupo de todo. De ke realizimos endjuntos? Muestro amigo, Alberto Modiano realizo su primer filmo dos anyos antes. Ma no pudo prezentarlo. La prezentasion del livro fue una okazion para el filmo. El filmo es sovre la vida de la balerina Lili Barokas i se yama, "Sevgili Lili”.

   Esta aktividad era muy emportante para mi. Ay serka de sesenta anyos ke konosko a Lili Barokas. Kuando teniya sinko o sesh anyos, mi ermana Rina, tres anyos mas aedada de mi, se iva al bale en Osmanbey, djusto en frente de la Sinagoga de Şişli. Era una kaza ke teniya dos entradas. La primera en Abidei Hürriyet, djusto en frente de la Eskola Saint Michel. I la segunda en la kaleja Efe, djusto enfrente de la puerta de la Keila de Şişli. I tomava lesyones kon un grupo de unas kuantas ijas de la famoza maestra de bale: Lili Barokas. Komo no aviya dingunos ke se va kedar kon mi en kaza i yo me iva a las lisyones i me asentava kon mi madre. Me estava ambezando lo ke las ijikas estavan azyendo. I tornando a kaza i yo aziya syertas figuras ke se ambezaron en la lisyon de bale…

   Despues trokaron de lugar i pasaron a la Plasa de Şişli, ande kontinuo a dar lesyones de bale mas de 50 anyos. En los dos lugares i su marido Ruben Barokas teniya su klinika de mediko.

  Kuando era prezidente de la Komunidad tuve la posibilidad de vijitarla unas kuantas vezes, mizmo kuando su marido, Ruben Barokas, doktor jinekologo estava sano. Eya ayudo a la komunitad kon todas sus posibilidades i esta kontinuando a ayudar kada vez ke puede. No solo para mi, ma para buen karar de dirijentes de la Komunidad, Lili es una ermana o una tiya. Es kara riyente, i para eya todo es pozitivo. No se kesha. Es oroza de bivir. Mizmo los ke biven en el mizmo kuartier o ke frekuentan el Klub de Yeşilyurt la konosen, la konosen porke kada diya kamina buen karar de kamino o djuga tenis en el Klub de Yeşilyurt. Komo esta dizyendo en el filmo djuga tenis solo una medya ora.

   Despues ke el livro fue sinyado por las dos dammas pasimos al salon de sinema para segir el filmo. En el filmo, vimos sus aktividades de kada diya i syertos pasajes mizmo de sus viyajes. Le plaze viyajar. Ver muevos lugares. Un diya despues de Roshana, le telefoni para vijitarla en su kaza. Me disho, no esto en Estanbol. M'esto indo a Bartın. Al lugar de los shokolas de Roshana le trushe un saksi de flores para felisitarla por su filmo i por el livro ke esta kontando su vida.

  Me akodro de un resital ke realizo en el Klub X, anyos antes kuando mi ermana Rina kontinuava las lisyones de bale. Kreo ke era el mizmo diya ke Lili Barokas alkanso a publikar un livro sovre el bale i sus pozisyones. Era para los ke se ambezavan este arte i para ke no se olviden lo ke se ambezavan en las lisyones. Mas de medyo siglo despues mi ermana esta konservando este livro kon su kapak kolorado.

   El filmo “Kerida Lili” kreo ke va ser mostrado por zoom de la parte del muzeo. I este modo todos los ke se enteresan van a pueder ver el filmo.

 

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR