Ganeden Bueno ke tenga Selim Hubeş

Silvyo OVADYA Judeo-Espanyol
22 Aralık 2021 Çarşamba

   Es mas de 50 anyos antes,  kuando estava en la eskola Saint Benoit, tenia un amigo Roni Baruh ke morava en Şişli serka del Ospital Etfal. Selim i su famiya moravan en la mizma kaleja ke Roni. Si vos akodrash, en esta epoka todas las kriaturas djugavan en las kayes i konosian todas las kriaturas de sus maalles. I aya tuve la posibilidad de konoserlo.  Despues ya se ke lavorava por el Dostluk Yurdu kuando era diridjente en el Klub Or Ahayim. Es aya ke se entereso kon el teatro Sefaradi i la muzika Sefaradi. Selim fue un elemento muy emportante para el teatro Djudio de muestra kultura Sefaradi. I munchos anyos se entereso kon la Muzika Sefarad. Ya savemos ke buen karar de tyempo Selim fue entresado kon la revista “İlgi” o “Beklenen İlgi”. No se kuantos mezes esta revista aparesyo? Ma Selim estava enteresado kon esta revista.

  Es en el 1990, kuando Los Pasharos Sefaradis tenian un konsyerto en Strasbourg, ke fui kon eyos porke akel fin de semana estava en Alemanya asperando una entrevista diya de lunes, i me fui de djugeves asta lunes demanyana a Strasbourg. Fue un konsyerto muy enteresante kon los Alsacienes i los Ashkenazes Djudios. Es dos semanas antes ke tuve la posibilitad de ver a David Sadaka, ijo del  regretado Hazday Sedaka ke bive en Strasbourg, en muestro Muzeo Djudio d’Estanbol kon su ija ke aze un echo de catering - Djudia Sefarad d’Estanbol ke se ambezo de su nona - en Paris. I durante los tres diyas en Strasbourg tuve la posibilitad de konoser de mas de serka a  Selim Hubeş. Estava muy kontente de sus kilos porke le agradava  komer. De komer bueno en grandes kantidades. Ma a lo ke entendi esto todo no le sirvyo muncho. Selim se entereso en los enstrumentos de muzika i tenia una koleksiyon bastante ancha. Mizmo unos kuantos anyos antes tuve la posibilitad de avlar kon una persona ke estava aparejando un muzeo de enstrumentos de  muzika. I avli kon los dos para propozar si keria el Pavion Selim Hubeş en su Muzeo. Lo acheto ma malorozamento no topo el lugar ke bushkava para fondar el Muzeo de los Enstrumentos Muzikales. Despues ke va demandar las ideas de su mujer Rozet Hubeş, kero  demandar una otra vez para el futuro de estros enstrumentos.

   Selim, kreo ke mas de 25 anyos, era el gitaristo i munchas vezes el kompositor del grupo “Los Pasharos Sefaradis”. Selim kon su savidura en la muzika, era el kompositor de syertas kantikas en esta lingua. En este siglo, reelmente no tenemos munchos kompozitores ke kompozan kantes en Djudeo-Espanyol.

   Selim era un ombre ke kritikava munchas kozas. Lo mas muncho puedeser ke tenia razon,  ma normalmente era muy adversaryo en todos los kavzos. Era yeno de ideas, ma gerreava muy severo para defender sus ideas. Selim era un ombre ke segia todo. No le faltava dingun detalyo. En el facebook o en otros medios elektronikos tenia la posibilidad de defender sus ideas. Este siglo era kriado para Selim. Porke antes, la djente no tenia la posibilidad de eksprimir tanto sus ideas.

   Selim era kazado kon Rozet Hubeş, artista de teatro i de sinema bastante konosida, komo echo era un kontavle reushido en su echo.

   Selim, ke tu alma repoze en Gan Eden.

Siz de yorumunuzu yapın

Tüm Yorumları Görün