Despues de la avyertura de una ekspozision en la Sinagoga de Ahrida

Silvyo OVADYA Judeo-Espanyol
6 Ekim 2021 Çarşamba

   Diya de Djugeves realizimos una nochada en la Sinagoga de Ahrida en Balat ande avrimos una ekspozision del famoso fotografo İzzet Keribar i prezentimos el livro de dos volumes sovre las Sinagogas de Turkiya. No era la primera vez ke este livro fue publikado. Ya savemos ke el semanario Şalom publiko por la primera vez este livro en el 2008 kon grandes esforsos. Esta vez el livro fue prezentado en la mas antigua sinagoga d’Estanbol ke se topa en Balat. Ya savemos ke esta sinagoga fue fraguada por la primera vez antes ke los Djudios Sefaradis vengan de la Espanya en el 1492. Ya savemos ke esta sinagoga fue restorada por la vez dalkavo en el 1992. Ya se ke siertos Balatlis no fueron muy kontentes de esta restorasion porke no toparon la mizma sinagoga ke tenian. No se si tyenen razon o no ma la Sinagoga de Ahrida oy en diya tiene un aspekto muy bueno.

  Diya de djugeves tuvimos la posibilitad de resivir el Gran Rabino İzak Haleva, el prezidente de muestra komunidad, Erol Kohen; los Konsules de la Alemanya, de la Polonya i de la Republika Cheka, syertos akademikos i los ke se enteresan a la fotografia.

   El segundo buto de esta avyertura era de prezentar la posibilitad a las personas ke son enteresados en la istoria de los Djudios de Estanbol i de Turkiya de pueder vijitar las mas antiguas dos sinagogas de Estanbol: Ahrida i Yanbol. Estas dos sinagogas fueron fraguadas por los ke vinieron de la Makedonia de Ohri i de la Bulgaria de Yanbol.

   Diya de vyernes, de alhad i de lunes mas de 180 personas vijitaron estas dos sinagogas. Antes de organizar esta aktividad dishe ke serka de 1000 personas van a vinir a vijitar estas sinagogas. Los tres primeros diyas mos dyo koraje. I kreo ke mas munchas personas van a vinir a vijitar. Va ser orozo por el Muzeo; va ser orozo por los ke vijitaron las sinagogas. Ya publikimos mizmo dos broshures en turko i en inglez sovre estas dos sinagogas.

   Estamos lavorando para ke esta ekspozision sea transferada a otros payizes komo los Estados Unidos, la Espanya, la Fransia i Israel. Los dos primeros achetaron avlando kon los ambasadores de las dos partes. En Fransia estamos en kontakto kon un Muzeo Djudio en Paris. No tuvimos solo kontaktos en Israel, ma vamos a tener. Va ser un onor de realizar una ekspozisyon en estos payizes. Mizmo puedeser una ekspozision mas ancha.

   Para eskapar mi artikolo vos va dizir ke ya puedesh vijitar mizmo el 24 del mez de Oktubre ande organizamos tures. Es el diya Evropeo de la Kultura Djudia. Para kontaktar devesh de telefonar al Muzeo Djudio: 0212 2926333.

 

Siz de yorumunuzu yapın

Tüm Yorumları Görün