Eliz Gatenyo
El penserio prinsipal de kada diya de una mujer, es: Kualo vamos a gizar oy?
Ma, de oy adelantre mas no mos kedo este dert. Vamos a pizar dos tres botonikos i tataaaan, la komida esta pronta.
Una kompaniya desvelopo un imprimador (printer) ke imprima kozas en 3D ke se pueden komer. Kero dizir ke estas kozas imprimadas tienen “altura, anchura i profundidad”. A las kartushes de el emprimador se mete kozas de komer en püre, al lugar de tinta. Uzan alimentos komo bezelyas, patatas, karotas, arroz i algas (yosun). I el marafet es vuestro de darle una forma a lo ke va salir. Si keresh, le dash una forma de pizza, si keresh le dash una forma de biftek o gato ets. Asigun la kolor de la püre ke metitesh en la kartush, puedesh dekorar vuestra komida. Por egzempio, puedesh azer un redondo kon kolor de la patata, i ensima puedesh meter rozikas coloradas kon püre de domat, ojas vedres kon püre de bezelyas, i rozikas oranj kon püre de karota. I despues lo komesh kon gusto, enshundya ke vos se aga, afiyet olsun.
El ke empeso este invento, penso de azer alimentos ke paresen a la karne i ke tiene la savor de la karne. Ansina no se tendra de matar bestyas. En el tiempo de la produksyon, se aparejan estas püres de materiales vejetales i se dan a la imprimadora. La imprimadora emprime la karne. Es posivle de imprimir asta sien i sinkuenta gramos de karne por ora. Deke toma muncho tiempo? Por modo ke se deve de asperar ke se seke el primer kat, para pueder plasar el sigundo kat, i ke tome una forma. I tambien asperar ke se seke el sigundo kat para meter el treser kat ensima ets. Esto es muy importante por ke este imprimador lavora kon un program de komputadora. El program deve ser areglado asigun del tiempo del sekar de la püre.
Despues de la karne, puedesh komer una pizza, i a la fin un gató de shokolata… todo imprimado. En Israel el restorante Food Ink es uno de los primeros restorantes ke imprima vuestras komandas.
A mi no me esta viniendo muy posivle ma nada no se save. En mi chikes mos diziyan ke en las Amerikas ay radios ande tienen un ekran i komo sinema djugan las personas aryentro de este ekran. Diziyamos: Ayde djanım … no este kadar de mintiras. Se izo verdad? Siiii… i este imprimador se aze verdad? Deke no!
Ke dizish?
