UN ENVERANO SIN AGUA I SIN MAR

Şeli GAON Judeo-Espanyol
28 Temmuz 2021 Çarşamba

Keridos  Lektores,

            Este virus “Corona” mos tomo la gana de bivir, los vaksenes no savemos ke karar van a pueder guadrarmos de esta hazinura maldicha, dingunos no saven nada, ni los doktores, ni las enfirmyeras, solamente los ke tyenen la edad de 65 por ariva mos estamos protejando kon maskas, sin abrasar a los keridos, sin pueder bezar a los inyetos, komo de vida ke vinimos?...

Entonses esto dando loores al Dyo ke esto sana i rezya, puedyendo irme al echo, okuparme de munchas kozas diferentes.

Solamente lo ke me esta azyendo pena es de no pueder entrar a la mar  ke so amorosa de la mar i de nadar oras largas.

Malorozamente la mar “Marmara” ya se mallogro kon este musilaj; esta muy suzya i entornada de mikrobes.

Mizmo los peshkados se estan muryendo, pekado i manziya!...

          Kualas son las kavzas de la suzyedad de la mar?

  • Las sivdades  konstruidas al bodre de la mar, estan vazyando las kanalizasyones a la mar.
  • Los residuos de las enstalasyones endustriales al bodre de la mar.
  • Las suzyedades de los aviones i de las arabas, de los kamyones…
  • La suzyedad de la mar no es solamente de los materyales plastikos ma i de los syerkos ke las personas estan echando.
  • Los elementos kimikos, los residuos universales, los polvos de los ayres estan arrastando estas suzyedades de un lugar al otro.
  • La kontaminasyon de lo ke estamos komyendo es una forma de kontaminasyon de la agua.
  • La kontaminasyon kavzada por los grandes vapores ke transportan petrol…
  • A kavza de este musilaj, los peshkadores no estan puedyendo peshkar.

Este musilaj sureya un mez disho un enjenyor, porke la temperatura de la mar esta alta.

Para tomar prekosyones kontra la suzyedad de la mar, kale ke las personas seyan konsensyozas.

Mizmo ke se esta tomando prekosyones, las personas deven de ser entelijentes para no echar nada a la mar, i spesyalamente kozas plastikas, porke no se desaparesen anyos largos…

Las tres partidas de la Turkiya son entornadas de mares. Esto es muy emportante sovre el punto de vista ekonomiko i del turizmo. Las mares son la kolor  blu la mas ermoza ke posedamos.

  • Deke devemos de protejar las mares?

El 71% de muestro mundo es las aguas de mar, de rio i de lagos. Para pueder protejar la ekolojiya de la natura i los ke biven en estas aguas, kale protejar en primero esta grande partida de 71%.

El musilaj esta danyando los bivos ke estan bivyendo aki en estas aguas. La  kontaminasyon de la mar aze ke, los ke biven en la mar se estan diminuando i desparesyendo de dia en dia. Kale topar una solusyon para ke las dos partidas seyan orozas.

                La kontaminasyon de las mares es un perikolo muy emportante ke menasa el mundo. Los desechos terrestres son la kavza la mas importante de la kontaminasyon de las mares. La kontaminasyon de las mares provoka las konsekuensas ke el ekosistem se bozdea, no se puede peshkar i esto es un grande problem para los ke ganan sus vidas de esta manera, i efektos negativos sovre la salud umana. Las mares son muy emportantes para pueder azer turar el futuro del umano.

              Protejaremos las mares “MANO KON MANO”, todos endjuntos por el avenir de muestras kriyaturas.

 

Siz de yorumunuzu yapın

Tüm Yorumları Görün