El dia de los padres komo todos los anyos se fyesta el treser alhad del mez de junio. El orijin de este dia remonta al siglo 20.
En el anyo 1966, el prezidente “Lyndon Johnson” deklaro este dia para ke se fyeste kada anyo.
El padre es el primer model de ombre ke tyenen sus ijos i ijas.
El es una figura de apoyo, la sansasyon de segurita. De aki puedemos ver la emportansa de su prezensya. El es la primera persona ke endjuntos kon la madre tomaran la responsabilita de los chikos.
El padre traye un sentimyento de apartenensya de los ijos a una famiya i a una sosyeta. Komo una figura sensible, el padre ayuda al ekilibro emosyonal de los ijos, savyendo entender i empatizar kon sus sentimyentos ke vyenen de aryento sus korasones.
Kuando el traye limitos klaros de segurita al ijo, el ijo deve de respektar estos limitos. Kuando los ijos tyenen un model de padre responsable, rasyonel, sereno i empatiko i el se va a modular sus sentimyentos agresivos, se va ambezar a komportarse de forma edukativa en las situasyones difisiles.
La figura del padre traye al ijo proteksyon. La prezensya, el kontakto del padre, su komunikasyon kon los ijos, el tyempo ke aparta para djugar es muy emportante por la konstruksyon psikolojika del ijo.
Azer programes rekreativos i kulturales a sus nesesidades sosyales i edukativos, alimentan el konsepto familyal de los ijos.
Es muy evidente ke la madre kon el padre, markaran la vida de sus ijos, kon sus influensas. Eyos son la primera eskola ande se ambezaran i eksperimentaran la emportansa de kerer byen los keridos. Kon eyos las ijas i los ijos se ambezaran a avrirsen al mundo i a la fin van a entender la emportansa de sosyalizarsen.
Eyos se ambezan i imitan lo ke ven aryento de kaza, la armoniya de los paryentes.
Un padre deve de entender ke todo lo ke kere enkulkar a su ijo, deve de pasar por el mizmo, azyendose el egzemplo.
El dezeo de transformarse para ser una persona mijor, aze ver a sus ijos ke es un lavoro muy difisil ke sureya vida entera kon sus ganansyas i piedritas kon la otosatisfaksyon komo adulto.
La prezensia de un padre krea una sansasyon de proteksyon…
En el nasimyento de un kriyo, el padre no es un spektator, es un aktor prensipal. No es akel ke unikamente se preokupa por lavorar para pueder pagar la kaza, la eskola, la komida…
Es akel ke se atrista de las nesesidades emosyonales de sus ijos, es akel ke tyene la kompreansyon, akel ke ofrese todo su amor a sus keridas i keridos.
Eyos djugan futbol, meldan un kuento i diskuten sovre el sujeto, djugan un djugo mental de meza i pasan el tyempo endjuntos kon grande plazer.
