Un Rekuerdo

Judeo-Espanyol
14 Nisan 2021 Çarşamba

Süzet Herman

Ivamos a fiestar el anyo muevo. Yo kije regalar a Sami, mi marido, un regalo presyozo.
Akel invyerno estava pasando muy huerte. La inyeve no se alevanto de embasho diyas i  diyas.
I la eskola ande Sami se estava indo no la estavan kaytando bueno. Yo pensi de merkarle un pulover shetland, ke era moda i komo viniyan de la Ingletiera eran bien karos.
Las paras ke yo estava ganando de la farmasiya kon el gaste ke teniya no me estava abastando para  merkar este pulover.
Kuando teniya 13 anyos mi padre me aviya regalado una kavenika muy delgada i en la punta teniya un korasoniko muy chiko.
No se komo un diya peryi este korasoniko. No puedesh saver komo me embaraso. Lo bushki diya i noche i no lo topi. Esta maniya era lo mas presyozo ke teniya en akeyos tyempos. I teniya solamente la kavenika en el braso, sin el korasoniko.
Kuando me desidi de merkar el pulover para Sami, me hui al saraf i la vendi. Entri al magazen kon las paras de la kavenika i le merki a Sami el pulover vedre. Vine a kaza kon un paketo bien grande i se lo di.
Kuando Sami avryo el paketo, se gusto muncho. Se la vistyo i le hue veramente muy ermozo.
Despues el kito de la aldikera un paketiko chiko i me lo ofryo.
Kuando avri el paketo vide ke me merko un korasoniko chiko paresyendo al ke peryi. El me disho, dame la kavena i pasaremos el korasoniko. No se komo lo miri ke el entendyo pishin i me disho: tu vendites la kavena para merkarme el pulover? Yo le meneyi la kavesa.
Mos abrasimos. I todos los dos ampesimos a yorar.
Estas lagrimas eran lagrimas de amor.

 

Siz de yorumunuzu yapın

Tüm Yorumları Görün