17 Mayıs 2021 Pazartesi 03:48
Zen Poliklinik 1 nolu alan
Zen Poliklinik 1 nolu alan

EL PROBLEM DEL GET EN ISRAEL

Dora NİYEGO Judeo-Espanyol 805 görüntüleme
14 Nisan 2021 Çarşamba

En el judaizmo, para ke un divorso se realize, el ombre kale ke de el ‘get’ a la mujer. Malorozamente, ay ombres ke estan refuzando de dar el ‘get’. Esto es una forma de esklavaje, i de abuzo emosyonal, porke el ombre esta forsando la mujer a la soledad. Estas mujeres no estan puedyendo kazarsen, o tener una relasyon kon un otro ombre asta ke el divorso se realize.

En la ley judiya, la mujer tyene el dirito de akseptar, o refuzar el ‘get’. Ma, oy en Israel, ay solo uno o dos ombres ke se estan sintyendo esklavos porke la mujer no esta akseptando el ‘get’.

‘En la ley judiya, el kazamyento es una realidad spiritual entre un ombre, una mujer i el Dio. Ansi, kuando este kazamyento se va dezazer, tyene menester del akordo de las dos partes’, esta eksplikando Eliyahu Maimon, el shef de la divizyon del rabinato israelyano ke se okupa del problema de get.

En el pasado, una aguna era una mujer ke el marido se fue a la gerra, i no torno mas atras. No se saviya, si el ombre estava bivo u muerto, i por modo de esto, la mujer no se puediya kazar.

Oy, estos kavzos son pokos. Si un ombre no kere salir delantre del tribunal judyo por divorsar, la mujer se konsidera komo ‘una aguna’. Oy, en Israel, si el tribunal desida ke el ombre deve de dar el ‘get’, i si el ombre no aksepta, el tribunal puede meter restriksiones a los diritos de este ombre. Le toman de la mano el permiso de konduizar, sus kartas de kredito, serran su kuento de banka, i lo ovligan a pagar una grande kantidad de moneda. En kavzos ekstremos, el tribunal puede desidar mezmo de meterlo al prezo.

Munchas vezes, estas restriksiones estan bastantes para konvenser el ombre a divorsar. Ma, ay ombres ke estan en las priziones u ke se fuyeron a otros payizes para no dar el get.

Rabino Maimon esta penando para kitar dos muevas leyes ke va ayudar a solusyonar este problema.

La primera ley va dar mas muncho poder a los tribunales judyos para meter otras restriksyones a los ombres ke estan en la prizion. Estos ombres no van a pueder avlar kon telefon, i sus paryentes o amigos no van a pueder vinir a vijitarlos.

La segunda ley va deklarar ke estos ombres van a ser konsiderados komo asasinos, i ansi no van a pueder fuirsen del pais.

Las organizasyones de mujeres, kada anyo, tyenen un Diya Internasional de Agunot. Este anyo el diya de agunot era el 25 de Febrero.  Akel diya, azen aktividades para proklamar este problem al mundo entero. El Grande Rabinato en Israel kere ayudar a estas mujeres ke estan en una situasyon difisil. Ma, kuando estos ombres se fuyen del payis, los rabinos israelyanos no estan puedyendo azer nada. 
 
En Bruksel, la semana ke pasimos, rabinos israelyanos i evropeos, anonsaron ke la baz de datos israelyana de ombres ke estan refuzando a dar el get a sus mujeres, se va azer internasyonal.
 
‘Este es el primer paso’ disho Eliyahu Maimon, ‘kon tyempo, vamos a inkluir tambyen los tribunales rabinikos de los Estados Unidos’.
 
Ma, no es seguro si estos pasos van a ser bastantes para reushir a solusionar el problem de las agunot.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ