Leh Leha

Rav Yeuda ADONİ Judeo-Espanyol
13 Ekim 2021 Çarşamba

Avraam Avinu sigun el orden de el Kriyador tomo a Sara i a Lot, su sovrino i vinyeron a la tyerra de Kenaan. Estonses se deklaro unas diferensyas entre los pastores de Lot, sovrino de Avraam, por kavza de la tyerra no abastesiya a mantener la muchidumbre de Ganado, ovejas i kuatropeas ke teniyan entre eyos.

Avraam Avinu keryendo evitar ke no uvyera pletos entre el i su sovrino, le roga a Lot su sovrino, de espartirse de el i irse a lugar ke le plaze mijor.

Lot izo lo ke disho Avraam Avinu, i eskojo la yanura de el Yarden ke es serka de las sivdades Sedom i Amora, i fue i se aresento ayi. Avraam se asento en la tyerra de Kenaan, en Hevron, en las yenaras de una persona nombrada Mamre. En akeos tyempos se deklaro un gerra entre los reyes de akeas lugares. Los reyes de Sedom i de Amora i otros tres reyes de una parte i Kedarlaomer, rey de la sivdad de Elam i tres reyes kon el de otra parte.

La Batalya fue vensida por Kedarlaomer i su partida, i tomaron todos los byenes de Sedom i Amora. I se yevaron tambien a Lot i a toda su azyenda.

Tuvyendo aviso Avraam Avinu, de este akontesimyento tomo kon el 318 personas de sus disiplos i presigo a Kedarlaomer i sus kompanyeros i los alkanso, i destruyo todo su fonsado, i rezgato a Loti, su sovrino i todo su azyenda i a Sedom i a Amora i todos las personas ke fueren kativados.

Avraam se torno a su lugar, i Lot se fue a Sedom akompanyado de los reyes.

Estonses le dyo a saver el Kriyador a Avraam Avinu, kon profetiziya todo lo ke tiene de pasar, su semen despues de tyempo i ke tenian ke estos kativos en tyerras ajenas, i le prometyo a el i su semen prometas grandes.

Syendo Avraam Avinu de 99 anyos, le komendo el Kriyador ke se sirkusyera el i Yismael, su ijo i todos los machos de su kaza. Esta enkomendansa de Mila deven de guadrarla su semen para syempre ke es un sinyal de aliansa i amistad ke izo el Kriyador a Avraam de darle un ijo de Sara su mujer despues de un anyo.

Siz de yorumunuzu yapın

Tüm Yorumları Görün